Menu 
Evge alıp kelgen uzun yol: Ukrainada qırımtatar halqınıñ bugüni ve keleceginiñ istiqballeri
05 Oktâbr 2011
2011 senesi oktâbr 5 künü Kiyev şeerindeki “HAYATT” ötelinde Qırımtatar halqınıñ Meclisi Milliy Meclis yolbaşçılarınıñ Ukrainada akkreditatsiya etilgen elçilikler ve halqara teşkilâtlarnıñ reberlerinen körüşüvi olıp keçti.
Qırımtatar halqınıñ yekâne aliy vekâletli-icra organı – Meclisniñ diplomatik korpus ile körüşmesinden baş maqsad 1944 senesi mayıs 18-de bütünleyin sürgünlikke oğratılğan ve on yıllarnen sürgünlik yerlerinde zoraki tutulğan qırımtatar halqını qaytaruv, yerleştirüv ve özüniñ tarihiy vatanında aq-uquqlarını ğayrıdan tiklev meseleleri boyunca tecribe almaşmaqtır, – dep qayd ettiler Meclis yolbaşçıları.
Körüşüv iştirakçileri qırımtatar halqınıñ Ukrainada bugünki vaziyetine dair müim meselelerinen tanış etildiler. Bunıñ kibi de programmada Qırımtatar halqınıñ öz tarihiy Vatanında aq-uquqlarını ğayrıdan tiklev, onıñ Ukrainada telükesizligi ve inkişafını teminlev meseleleriniñ muzakeresi ayrıca yer aldı.
Esas maruzalarnen Qırımtatar halqı Meclisiniñ reisi, Ukraina halq deputatı MUSTAFA CEMİLEV ve Bütündünya qırımtatarlar kongressiniñ prezidenti, Qırım Muhtar Cumhuriyeti Yuqarı Şurasınıñ deputatı REFAT ÇUBAROV çıqışta bulundılar.
Programmanıñ devamı olaraq körüşüv iştirakçileriniñ “Sual-Cevap” şekilinde munaqaşası oldı.
Körüşüvge Avropada Telükesizlik ve Emekdaşlıq boyunca Teşkilât, Ukraina Prezidenti Memuriyeti, Ukraina Yuqarı Radası, Ukraina Nazirler Kabineti ve Ukraina Tışqı işler nazirliginiñ vekilleri de davet etildiler.
Körüşüv “Qırım inkişafınıñ fondı” hayriye teşkilâtınıñ destegi ile ötkerildi.
