Menu 
Eski Qirim milliy mektebi 15 yaşini qayd ett
27 Sentâbr 2011
Eski Qırımda qırımtatar milliy tasilniñ ğayrıdan tiklenmesi 90-nji seneleri 17 talebeden başlanğan edi. 1996 senesi ise akimiyetnen büyük davalarnen açılğan milliy mektep İslâm Terek rayonında qırımtatar tasil sistemasına qaviy temel qoydı. İlk dersler rale, tahta, dersliksiz keçken edi, amma ana-babalar balalarını mektepten almadılar ve rus mektebine keçirmediler. Yerli meclisniñ ve şu yılları reis olğan İbraim Baynı bu davada rolü pek büyük. O, Eski Qırım cemaati-niñ başı olaraq, mektep meselesinde qattı turdı. Mecliske qol tutqan yerli faal insanlar: Ebazer Emiraciyev, Şevket Asanov, Qurtseit Seytablayev, Mustafa Toroz, Ayşe Ablâzova, Lilâ Mustafayeva, din cemiyetiniñ reisi Rasim bey Sadreddinov ve digerler bu künge qadar mektepke asabalıq etip kelmekteler.
Endi tizilgen “Maarifçi” birleşmesiniñ reisi Safure Kacametova ise qadın olğanına baqmadan mektepke qaviy bir arqa. Onıñ talapçanlığınen 1998 senesi mektep ilk kere tamirlendi ve kerekli oquv eşyalarınen tamin etildi. Şu yılları maarifçilerniñ SOS çağıruvına seslengen Ukraina Milletler komitetiniñ reis muavini Yuriy Nikitoviç Beluha ayrı alğışlarğa lâyıqtır. Yartı-yurtı bina tamir işlerinden soñ niayet mektepke uşadı, sınıflarğa yañı masa, rale, dolaplar kirgen soñ, mektepniñ oquv-terbiyeviy işleri daa ziyade canlandı.
2010 senesi ise, Milliy Mejlisimizniñ altınında, maarifçiler “Alraid” teşkilâtınen beraberlikte mektepniñ emek terbiyesi, tibbiyet, fen kabinetlerini ve kompyuter ve diger sınıflarnıñ maddiy – tehnika bazasını tolusınen pekittiler ve mektepniñ çevresini yevroisarnen qoraladılar. Bu hayriye işler İslam Bank İnkişafı-nıñ maliye qoltutuvında yapıldı Dört yıl evel TİKA mektep binasınıñ içi – tışını yañıdan tamir etti.
On beş yıl içersinde mektep 500-den ziyade mezun çıqarıp, milliy maarifi-mizniñ kadrlar azırlavuna öz issesini qoştı. Bunıñ isbatı – yubiley tedbirinde sanağa çıqıp mektep ve ocalarını hayırlağan adliyeci, rejissör, ekim, ingliz tili zenaatlarnı menimsegen mektep mezunlarıdır.
“Al azırda mektepniñ kündüzgi bölüginde 363, aqşamki bölüginde 19 talebe oquy, çeşit fenlerden 43 oca ders bere, aşçı, temizlevci, qaravul ve diger insanlarımız çalışa” – dey mektep müdiri Ayşe Çabanova. Ayşe oca eñ evelâ milliy mektepniñ kelecegine işanıp öz evlâtlarını bu mektepke ketirgen ana-babalarğa, mektep talebeleri, yerli cemaatçılıq, Milliy Meclis, “Maarifçi” birleşmesi ve daa çoqtan çoq insanlağa ve teşkilâtlarğa işanç ve yardımları içün samimiy teşekkür bildirdi. Halqara teşkilâtlar Eski Qırım mektepniñ inkişafında ğayet emiyetli yer ala,– dedi müdir, ve şu sırada mektep azbarında bala bahçasını qurmağa yardım eterler dep, – şanç beslegenini ayttı.
On beş yıl insan içün pişkinlik çağı olsa, milliy tasilni tiklegen mektep içün yaş nesilniñ terbiyesinde emiyetli yer alğan, an-anelerni meydanğa ketirgen zamanıdır, degen fikir hayırlav sözlerini aytqan memur ve cemaatçılar tarafından bildirildi.
QYUŞ deputatları, Milliy Meclis azaları Refat Çubarov ve Safure Kacametova mektepke zarur kitap, bir sıra tehnik vastalarınen beraber müdir Ayşe Çabanovağa milliy meclis reisi Mustafa Cemilev imzalağan teşekkürnameni taqdim ettiler. Tasil nazirligi, yerli memuriyet ve diger teşkilâtlarnıñ vekilleride sözge çıqtılar.
Sevgen mektebiniñ yubiley tedbirinde yır, oyunlar icra etken talebeler ve yetekçi ocalar öz milliy maarif ocağına en samimiy sözler bağışladılar. Mekteb talebeleri: Leniye Ümerova, Şahsne Degirmenci, Asan İsmailov – olar içün mektep ekinci evi olğanını, mektep olarğa ana tiline, milletimizge, medeniyetimizge sevgi ve ürmet aşlağanını, derslerni sevgen ocaları bergenini minnetdarlıqnen qayd ettiler.
