Eskender Bariiev “Ukraina milliy toplulıqları – tarihiy vaqialar ve umumdevlet kontekstindeki zemaneviylik” tögerek masasında iştirak etti

24 January 2025

Qırımtatar Milliy Meclisiniñ azası Eskender Bariiev Ukraina Birligi Kününe bağışlanğan ve Kuras adına Ukraina Milliy ilimler akademiyasınıñ Siyasiy ve qavmiy-milliy araştırmalar institutında olıp keçken “Ukraina milliy toplulıqları, tarihiy vaqialar ve umumdevlet kontekstindeki zemaneviylik” mevzusında tögerek masada iştirak etti.

Öz çıqışında Bariiev bir qaç esas tezisni qayd etti:

– Rusiye-Ukraina cenki 2014 senesi Qırım işğalinden başlandı. 2014 senesinden başlap qırımtatarlar Ukrainanıñ topraq bütünligini qorçalaylar. İşğal şaraitinde, sözde referendum arfesinde, 2014 senesi saban ayınıñ 15-nde, Qırımtatar Milliy Meclisi Ukraina Yuqarı Şurasına ve bütün ukrain halqına muracaat etip, dünyada birinci olıp Ukrainanıñ suvereniteti ve topraq bütünligine qol tuttı, ve böyleliknen, qırımtatarlarnıñ tamır halqı olaraq özlerini nasıl bir memlekette yaşamaq istegenlerini belgilediler;

– Ukrain siyasiy milleti tamır halqlarınıñ ve milliy azlıqlarnıñ aqları temin etilse, turğun olacaq. 2021 senesi Ukraina tamır halqları aqqında qanun ve 2023 senesi Ukraina milliy azlıqlar (toplulıqlar) aqqında qanun qabul etildi. Bariievniñ aytqanına köre, Tamır halqları aqqında Ukraina qanunı aqqını alması içün 17 qanun leyhası qabul etilmeli ve Ukrainanıñ 10 qanunına deñişmeler kirsetilmeli, lâkin bugünge qadar Ukraina Nazirler Kabineti tek eki qanun leyhasını qabul etti;

– tamır halqları ve milliy azlıqlarnıñ vekilleri Rusiyeniñ Ukrainağa nisbeten 2022 senesi kiçik aynıñ 24-nde Ukrinformda keçirilgen matbuat konferentsiyasında Rusiyeniñ tolu miqyaslı istilâsına qarşı çıqıp, ukrain siyasiy milletiniñ bir qısmı olğanını ve öz memleketini qavmiy ukrainlernen beraber qorçalamağa azır olğanını numayış ettiler;

– Ukrainanıñ Birligi esnası, vaqtınca işğal etilgen topraqlar işğalden azat etilecek soñ, olarnıñ reintegratsiyası vaqtında eñ aktual olacaq. 10 yıldır işğal etilgen topraqlarda Rusiye teşviqatı ve repressiyalarınıñ sistematik basqısı altında bulunğan vatandaşlarımıznıñ bütün bir nesli deñişe.