Berlinde Eskender Bariiev Tamır haqlarınen dialog platformasında iştirak etti

01.12.2025

Boş aynıñ 27-28 künleri Berlinde rusiye federatsiyasında tamır halqlarınıñ vaziyeti ve sürgünlikte olğan rusiye demokratik quvetlerinen işbirligine bağışlanğan Tamır halqlarınen dialog platforması olıp keçti. İşke Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariiev qoşuldı.

Tedbirde rus istilâsınıñ tamır halqları içün aqibetleri, arbiyleştirüv ve ayırım siyaseti, medeniy ve til aqları içün telükeler, em de müstemleke siyasetiniñ tesiri ve ekologik telükeler muzakere etildi. “Tamır halqları – rusiyeniñ Ukrayinağa qarşı tecavuzı çerçivesinde insanlıqqa qarşı cinayetler ve cenk cinayetleriniñ qurbanları” maruzasında Bariiev Qırımda sistemalı repressiyalarnı qayd etti ve 2014 senesi tarihiy qararlarını hatırlattı, o vaqıt Meclis dünyada ilk sefer Ukrayina suvereniteti ve topraq bütünligine açıq qol tuttı.

“Bugün, Qırım işğaliniñ 12 yıllığında, men tasdıqlay bilem ki, qırımtatar halqı dünyada daa belli ve subyektiv oldı, Ukrayinada ise tamır halqları aqqında qanun qabul etildi, bu da rusiye akimiyetiniñ menfiy reaktsiyasını doğurdı, çünki onıñ qabul etilmesi “rus dünyası” natsist mefküresiniñ yoq etilmesine yardım ete. Bu misal ile tamır halqları esnaslarğa tesir etip, öz subyektivligi içün küreşkenini köstere bilemiz”, – dep Bariiev tefsir etti.

O, iştirakçilerni işğal etilgen Qırımda kerçek vaziyet aqqında haberdar etti. Qırımtatar Resurs Merkeziniñ malümatına köre, işğal vaqtında 477 siyasiy mabüs qayd etildi, olarnıñ arasında 269 qırımtatar bar; 61-i ölü; 32-sş zorbalıqnen ğayıp oluv adisesi qayd etildi. Bugünki künde rusiye SİZOlarında ve müstemlekelerinde 316 Qırım siyasiy mabüsi tutula, olardan 176-sı – tamır halqınıñ vekilleridir.

Bariiev qadınlar, gençler, qartlar ve saqatlarnıñ taqip etilüvine, em de tibbiy yardım berilmegeni sebebinden siyasiy mabüslerniñ ölümine diqqat çekti.

Berlinde keçirilgen dialog platforması halqara toplulıqnıñ diqqatını tamır halqlarınıñ, hususan qırımtatarlarnıñ vaziyetine ve rusiyege qarşı halqara basqını quvetleştirmege talap etken insan aqlarınıñ bozuluvına celp etmek içün imkân yarattı.

Soñunda iştirakçiler “rusiye tamır halqlarınıñ vaziyeti aqqında” muracaatını ve AŞPAnıñ 2621 (2025) rezolütsiyası çerçivesinde tamır halqlarınıñ aqlarını qorçalamaq kerekligini qayd etken Tamır halqları dialogı platformasınıñ Beyannamesini qabul ettiler.