Eskender Bariiev OSCEniñ Varşava insan ölçesi konferentsiyasında çıqışta bulundı

14.10.2025

Orta küz ayınıñ 13-nde, OSCEniñ Varşava insan ölçesi konferentsiyası çerçivesinde Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariiev “Tolerantlıq ve ayırımsızlıq, şu cümleden milliy azlıqlarğa ait şahıslarnıñ aqları” mevzusında plenar sessiyasında çıqışta bulundı.

Öz çıqışında Bariiev, ilk evelâ, aza devletlerine Rusiyeniñ cenk cinayetlerine qarşı küreşte Ukrayinağa qol tutqanları içün teşekkür bildirdi, devletlerara zıddiyet kontekstinde tamır halqlarınıñ vaziyetine diqqat ayırmaq müimligini qayd etti, em de Ukrayinanıñ tamır halqlarnıñ aqlarını qorçalav saasında yapqanı müim adımlarını ve olarnen qarşılaşqanı qıyınlıqlarnı hatırlattı.

Onıñ qayd etkenine köre, endi eki yıldır Ukrayina Nazirler Kabineti Qırımtatar Milliy Meclisine tamır halqınıñ temsil organı olaraq uquqiy statusını pekitüv esnasını ve Rusiyeniñ silâlı istilâsı sebebinden qırımtatar halqınıñ öz muqadderatını belgilev aqqını kefil etecek deñişmelerni Ukrayina Anayasasına kirsetmemek meselesini uzata.

Buña baqmadan, onıñ aytqanına köre, esas mesele Qırım toprağına kirişniñ olmaması olıp qala, anda tamır halqınıñ aqları muntazam sürette bozula: Qırımtatar Milliy Meclisiniñ faaliyeti yasaqlana, apiske aluvlar, zorbalıqnen ğayıp etüvler, faalcilerge qarşı repressiyalar ve ilâhre etile.

Eskender Bariiev Ukrayina ve halqara qurulışlarğa bir sıra tevsiyeler berdi:

– Ukrayinağa – BMTnıñTtamır halqlarınıñ aqları aqqında beyannamesiniñ amelge keçirilmesi içün Milliy plan azırlanmalı ve tamır halqınıñ temsil organı olaraq Qırımtatar Milliy Meclisiniñ uquqiy statusını pekitüv esnasını yekünlenmeli;

– OSCEge – OSCE bölgesindeki tamır halqlarınıñ vaziyetini eyileştirmek içün Areket planını azırlamaq;

– Birleşken Milletler Teşkilâtına – Ukrayinanıñ tamır halqları içün Gumanitar cevap planını azırlamaq.

Aynı şu künü Qırımtatar Resurs Merkezi “Ukrayinanıñ işğal etilgen topraqlarında ırq ayırımı insan ölçüsinen bağlı sistematik mesele olaraq” adlı yan tedbirni keçirdi. Tedbir, Ukrayinanıñ vaqtınca işğal etilgen topraqlarında tamır halqlarınıñ kollektiv aqlarına qarşı ırq ayırımı ve repressiyalarnıñ sistematik siyaseti ve olarnıñ vekilleriniñ aqları taliline bağışlandı.