Eskender Bariiev BMTnıñ tamır halqları aqları boyunca mütehassıs mehanizminiñ Sessiyasında çıqışta bulundı

17.07.2025

Qırımtatar Milliy Meclisiniñ azası ve Qırımtatar maaliy merkeziniñ idare reisi Eskender Bariiev bu künleri Jenevada keçirilgen BMTnıñ tamır halqlarınıñ aqları boyunca mütehassıs mehanizminiñ 18-inci sessiyasında iştirak ete.

Bariiev, BMTnıñtamır halqlarınıñ aqları boyunca Beyannamesiniñ maqsatlarına irişüvde milliy ve bölge insan aqları institutlarınıñ rolü boyunca plenar toplaşuvda çıqışta bulundı.

Öz çıqışında o, devletlerara zıddiyet kontekstinde tamır halqlarшnıñ vaziyetine diqqat ayırmaq müim olğanını qayd etti ve Beyannameniñ amelge keçirilmesinde milliy ve bölge uquq qorçalayıcı institutlarnıñ rolüne diqqat ayırdı. O hatırlattı ki, 2014 senesinden soñ Ukrayina qırımtatarlar, qaraylar ve qırımçaqlarnı tamır halqları olaraq tanıdı, Ukrayina Prezidenti yanında qırımtatar halqınıñ meseleleri vekâletli institutı quruldı, Ukrayina tamır halqları aqqında qanun qabul etildi, o, Beyannameniñ esaslarına esaslana ve tamır halqlarınıñ aqlarını qorçalav siyasetini azırlav devlet mehanizmleri kirsetildi.

Eskender Bariiev qayd etti ki, bu deñişmeler Qırımtatar Milliy Meclisiniñ – tamır halqınıñ temsiliy organınıñ – ve bir sıra diger teşkilâtlarnıñ faal iştiragi sayesinde oldı.

Meclis azası oturış iştirakçilerini qırımtatar halqınıñ qarşılaşqanı meseleler aqqında haberdar etti:

– eki yıldır Ukrayina Nazirler Kabineti tamır halqınıñ temsil organı olaraq Qırımtatar Milliy Meclisiniñ uquqiy statusını pekitüv esnasını soza;

– Rusiyeniñ arbiy istilâsı sebebinden Ukrayina Anayasasına qırımtatar halqınıñ öz-özüni tayin etüv aqqını kefil etken deñişmelerni kirsetmek imkânsızlığı;

– tamır halqınıñ aqları muntazam sürette bozulğan Qırımğa kiriş imkânınıñ olmaması: Meclisniñ yasaq etilmesi, apiske alınmalar, zorbalıqnen ğayıp etüv, faalcilerge qarşı repressiyalar.

Bariiev halqara teşkilâtlar ve Ukrayina akimiyetine muracaat etip, Beyannameniñ yerine ketirilmesi içün areket planlarını azırlamağa çağırdı.