Enver Alibayev –sportqa bağışlanğan ömür!

11 Mayıs 2011

2011 senesi iyün 10 künü Aqmescitte 1-nci Qırım cumhuriyet bala-ösmür sport mektebi iş kollektiviniñ toplaşuvı olıp keçti.

Sport mektebiniñ faaliyetine dair meselelerni muzakere etip başlamazdan evel, onıñ hadimleri ve toplaşuvğa kelgen musafirler belli trener, pedagogika ilimleri namzeti, ömüriniñ 52 yılını büyük sportqa bağışlağan, soñki 18 yıl devamında ise şu mektepke yolbaşçılıq yapqan Enver Alibayevni hayırladılar.

Bütündünya qırımtatarlar kongressiniñ prezidenti, KÜREŞ Milliy küreş Qırım federatsiyasınıñ fahriy prezidenti Refat Çubarov, Qırım cumhuriyet tasil ve ilim, gençlik ve sport naziriniñ muavini Natalya Gonçarova, Qırım cumhuriyet tasil ve ilim, gençlik ve sport nazirligi sport idaresiniñ başı Vitaliy Romanov, diger musafir ve toplaşuv iştirakçileri Enver Alibayevge samimiy tebrik sözlerini ayttılar.

Enver Alibayevniñ endi çoqları sportta büyük ğalebelerni elde etken genç sportçılarnı terbiyelev ve azırlavğa qoşqan büyük issesini qayd etken Refat Çubarov bunıñ kibi de bala ve ösmür sport mektebi iş kollektiviniñ faaliyeti Qırım içün nasıl büyük emiyetke malik olğanını ayrıca söyledi. “Yañı nesil qırımlı sportçılarnıñ çoqmilletli erkânı yaşlarnı kelişmegen, çirkin areketlerden qorçalay”, dedi Refat Çubarov.

Refat Çubarov belli trener ve pedagog Enver Alibayevge Qırımtatar halqı Meclisi adından Fahriy yarlıq taqdim eterken, bunıñ kibi de Milliy Meclis reisi Mustafa Cemilevniñ selâmı ve hayırlavını da bildirdi.

Bunıñ kibi de Enver Alibayevge Qırım Yuqarı Şurasınıñ reisi ve Qırım dzüdo ve sambo federatsiyasınıñ prezidenti Vladimir Konstantinov, Qırım cumhuriyet tasil ve ilim, gençlik ve sport nazirliginiñ adından Fahriy yarlıqlar berildi.