Emine Avamileva: «Akimiyet organları ve qırımtatarlarnıñ milliy idare organlarınıñ işbirligi tasil meselelerini çezüvde müsbet netice berir»

13 Dekabr 2013

Dekabr 13 künü Saq rayon devlet memuriyetinde olıp keçken tögerek masa etrafındaki toplaşuvda Saq rayonında qırımtatarlarnıñ tasili ve medeniy inkişafı meseleleri etrafında muzakere etildi.

Tedbirde Meclis reisiniñ muavinleri Zaur Smirnov, Nariman Celâl ve Ayder Acimambetov, Saq rayon devlet memuriyetiniñ başı Aleksandr Övdiyenko, Saq rayon şurasınıñ reisi Nikolay Rassolovskiy, Meclisniñ qırımtatar tilinde tasil ve qırımtatar tilini Qırımnıñ devlet ve cemaat ömürine tadbiq etüv meseleleri boyunca idaresiniñ başı Emine Avamileva, Saq regional meclis reisi Eskender Bilâlov, Saq rayon devlet memuriyeti tasil bölüginiñ müdiri Vladimir Sobolev, medeniyet bölüginiñ müdiri Aleksandr Grabina, milletlerara munasebetler ve din meseleleri boyunca bölük müdiri Aliye Veysova iştirak ettiler.

Emine Avamilevanıñ aytqanına köre, tögerek masa tedbiriniñ iştirakçileri Saq rayonında qırımtatar tilinde tasil, qırımtatar tilinde oqutılğan orta ve mektepkece tasil müessiseleri içün kadrlarnı azırlav, bunıñ kibi de rayondaki bala bağçalarını metodik qullanmalarnen teminlev, medeniy inkişaf ve halq adetlerini saqlap qaluv meselelerini muzakere ettiler, Taraflar ağımdaki problemlerni çezüvniñ esas yollarını da belgilediler.

“Eñ müimi –bu, elbetteki ana-babalar balalarınıñ ana tilini ögrenmesiniñ zarurlığını añlamalarındadır, – dedi E.Avamileva ve şunı da qayd etti ki, ana tilinde tasil almaq içün akimiyet tarafından zarur şarait yaratılmalıdır.

Öz nevbetinde Saq rayon devlet memuriyetiniñ başı Aleksandr Övdiyenko dedi ki, balalarnı qırımtatar tilinde oqutuv yalıñız ana tilinde serbest qonuşmaq imkânını bermek degil de, balalarğa öz halqınıñ maneviy baylığına, milliy anane ve adetlerge sayğı aşlar. “Bugünde-bugün rayon akimiyetiniñ vazifesi Saq rayonında yaşağan bütün halqlarnıñ tasili içün oñaytlı şaraitler yaratmaqtan ibarettir”, – dedi Aleksandr Övdiyenko.

“Biz öyle fikirge keldik ki, akimiyet organları ve qırımtatarlarnıñ milliy idare organlarınıñ işbirligi tasil meselelerini çezüvde müsbet netice berir”, – dep qayd etti Emine Avamileva. – Bu iş qırımtatarlarnıñ milliy tasil sistemini, medeniy degerlikleri ve maneviylikni saqlap qaluv ve inkişaf ettirüvge doğrultılacaq”.

Meclis reisiniñ muavini Zaur Smirnovnıñ bildirgenine köre tögerek masa tedbirinde bunıñ kibi de oquv müessiselerinde ve akimiyet organı binalarında qırımtatar tilinde işaretler olmasınıñ kerekligi de qayd etildi.

Saq rayon şurasınıñ reisi Nikolay Rassolovskiy bu meseleni nevbetteki sessiyanıñ kün tertibine kirsetilmesini teklif etti.