Elvida, safdaşımız Adnan bey …

05 Yanvar 2014

Türkiyeniñ büyük ve belli şeerlerinden biri – Bursadan qara haber keldi.

Bursa qırımtatar dernegine çoq yıllar devamında yetekçilik yapqan, bunıñnen beraber milliy areketimizniñ faal iştirakçisi, Qırımnıñ aqiqiy vatanperveri, ecdatları Özenbaş köyünden olğan Adnan Suyen apansızdan vefat etti.

Yüregi inqiraz neticesinde bugün, 5 ocaqta (yanvar) uruvdan toqtağan dostumız, safdaşımız ale daa 59 yaşında edi.

Yaşlığından milliy davamızğa qoşulğan Adnan bey qısqa vaqıt içinde Türkiyedeki qırımtatar diasporasınıñ körümli faali ve birazdan Bursa derneginiñ yolbaşçısı oldı.

1990 seneleriniñ ortalarından Türkiyeniñ aliy okuv yurtlarına, şu cümleden Bursağa yüksek tasil almaq içün Qırımdan kelgen gençlerge er taraflama ve samimiy yardım etti, atta babalıq yaptı, desek de doğru olur.

Defalarca Qırımğa kelip, mında da çeşit milliy saalarda cemaatımıznıñ işlerinde qolundan kelgen areketlerini becermege tırıştı. Qurban-Bayram künleri ekseriyetle Qırımda bulunıp, vatandaşlarımız toplu yaşağan yerlerde dernek adından nice-nice qurbanlar çaldırttı.

Soñki yılları Qırımda Qurultay qararınen qayd etilgen Milliy bayraq künü keniş ve tantanalı derecede ötkerilmesinde A. Suyenniñ issesi çoq sezerli oldı, çünki Ukrainada eñ büyük ölçüvli olğan bizim milliy bayraq Bursada onıñ qoltutuvınen azırlanıp, Qırımğa yetkizildi.

O, teşebbüsçi ve yolbaşçılıq yapqan, diaspora arasında keniş darqalğan “Qalğay” mecmuanıñ mündericeli içtimaiy-yarıqlandıruv neşirge çevirilmesi de fedakâr milliy faaliyetniñ köstergiçi oldı.

Matem künümiz 18-mayısta Aqmescitte, milletinen olmaqnı Adnan bey öz borcu dep tanıy edi. Keçken yılı, deşetli sürgünlikniñ 69 yıllığına, dersiñ, bizim meydanımızğa soñki sefer kelgenini sezip, söz soradı ve, er vaqıttaki kibi, halqımızğa nisbeten ğurur duyğular ile tolu salmaqlı ve eyecanlı çıqışta bulundı.

İslâm-Terek rayonınıñ Köleç-Mescit köyünde Bursa dernegi cami quracağı aqta qararnı 11 aralıqta (dekabr) mında kelip, cemaat ögünde seslendirgen dernekniñ yetekçisi çoq alğışlar qazanğan edi.

Adnan Suyenniñ parlaq hatırası aramızda daima yaşar.

Onıñ ömür arqadaşı Yasemin hanımğa, üç evlâdı ve torunlarına teren taziye bildiremiz. Cümle yaqınlarına baş sağlığı tileymiz.

Alla rahmet eylesin!

Qırımtatar Milliy Meclisi