Elifbelerinen sağlıqlaşuv tedbiri Aqmescit rayonınıñ Acı Qal (Çistenkoye) köynde kecireldi

29 Mayıs 2012

Keçken sene   Aqmescit rayonınıñ Acı Qal (Çistenkoye) köy mektebinde  1-nci  oqutuv qırımtatar tilinde alıp barılğan milliy sınıf açılğan edi.  Sentâbrniñ 1-de ana tilinde laf etmege bilmegen kencetaylar  doquz aydan soñ  “Elifbe bayramı”nda tek tuvğan tilinde laf ettiler.          

1-nci sınıfnı bitirgen balaçıqlarnı ana-babalar, Qırım Yuqarı Şurasınıñ deputatları, yerli meclis azaları hayırlap ediyeler bağışladılar.                

Aqmescit rayonını  Acı Qal  köy mektebinde 746 talebe oquy. Olarnıñ 50% ziyadesi qırımtatarlar. Çalışqan oca ve hızmetçilerniñ ekseriyeti de qırımtatarlar. Lâkin buña baqmadan oqutuv qırımtatar tilinde alıp barılğan 1-nci  milliy sınıf tek keçken sene açıldı. Bu sınıfta tasil alğan Abdaraman Mecitov, Bekir Mustafayev, Feride İbraimova, Emir Abduramanov ve Şevket Bakiyevniñ ana – babası öz evlâtlarınıñ  kelecegini  tuvğan müitinde körip milliy sınıfqa ariza yazğan ediler.  Kencetaylarğa ana tilini aşlağan Elzara oca Nimetullayeva ilk derslerni  rusçadan  başlap, yavaş-yavaş   qırımtatarcağa  keçkenini eyecannan   hatırlay.                 

Elifbelerinen sağlıqlaşuv tedbiri masal şekilinde keçip ep qaramanlar qırımtatar tilinde laf ettiler. Talebelerniñ icrasında yır ve şiirler er kezge quvanç bağışladı.                   

Bu milliy sınıfnıñ açılışına büyük isse qoşqan QYUŞñ deputatı, Milliy Meclisniñ  medeniyet  ve tasil idaresiniñ reberi,  “Maarifçi” birleşmesiniñ reisi Safure Kacametova, Acı Qal  köy meclisiniñ reisi Elmira Asanova   ve olarnen daima beraber çalışqan Qırım Yuqarı Şurasınıñ milletlerara ve sürgünlikke  oğratılğan  grajdanlarnıñ problemleri  boyunca Daimiy Komissiyanıñ  reisi, Milliy Meclis reisiniñ  muavini    Remzi İlyasov kencetaylar, ocaları ve mektep memuriyetine ediyeler   ve   mültimedia  printerini  taqdim tip,  bu saada çalışmalar devam etilecegine işanç bağladılar.                   

Ana-babalar, Qadın qızlar birliginiñ vekilleri, yerli cemaatçılıqnıñ merağını  ve diqqatını körgen mektep müdiri Lübima Kotolupova Ukraina ana yasası kaidelerini yerine ketirmege razılıq bildirdi.     Yañı oquv yılında bu mektepniñ 1-nci  sınıfına kelecek 50 qırımtatar balalarınıñ ana tili müitinde oqup, ösmege imkân olacağı  endi  olarnıñ ana – babalarına bağlı.