Dmitriy Tabaçnik TMU Qırımtatar ve şarq filologiyası fakultetinde ocalarnı qısqartuv problemine seslendi

30 Sentâbr 2013

Meclis reisi M. Cemilev ve Vernadskiy adına TMU rektorı N. Bagrovnıñ qırımtatar ve şarq filologiyası fakultetindeki problemlerni çezüv yollarını araştıruvnı muzakere ettikleri körüşüvi neticeleri boyunca M. Cemilev Kiyevde Ukraina Tasil naziri Dmitriy Tabaçnik ile körüşken edi.

Hatırlatamız ki, körüşüvge qırımtatar ve şarq filologiyası fakultetinde ocalar ve ders saatleriniñ qısqartılmasınen bağlı vaziyet sebepçi olğan edi.

Subet devamında Ukraina tasil ve ilim naziri Dmitriy Tabaçnik Mustafa Cemilevge şunı bildirdi ki, yolbaşçılıq yapqan nazirligi Qırım ve umumen Ukrainadaki aliy oquv yurtlarında kadrlarnı ya da saatlerni qısqartuv boyunca iç bir türlü emir bermedi. Bundan da ğayrı Dmitriy Tabaçnik 2013 senesi oktâbr ayınıñ başlarında qırımtatar ziyalılarınen körüşip, qırımtatar tili ve edebiyatını inkişaf ettirüv ve saqlap qaluv, tasil saasındaki diger meseleler aqqında laqırdı etmek niyetini bildirdi.

Körüşüv neticeleri boyunca Dmitriy Tabaçnik M. Cemilevniñ adına resmiy mektüp yollap, onda TMU qırımtatar ve şarq filologiyası fakulteti ocalarını finansirlev meselesini tekrar ögrenmekni talap ete, dedi. Çünki devlet bücetinden sermiyalar umumen aliy oquv yurtlarınıñ finansirlenmesi içün közde tutula.

Meclis maarif ve medeniyet idaresiniñ başı, “Maarifçi” birleşmesiniñ reisi Safure Kacametovanıñ aytqanına köre Ukraina tasil ve ilim nazirliginiñ cevabı nazir D. Tabaçnikniñ problemni ögrenmek ve al etmek meramından delâlet bere.