Dilâra abla Bariyevanıñ vefatı sebebi ile taziye

18 Mart 2018

17 mart künü Aqmescit şeerinde, Qırımtatar Milliy Meclisniñ azası Eskender Bariyevniñ anası – Dilâra abla Bariyeva vefat etti. 

Dilâra abla Bariyeva 1938 senesi Kezlevde ekimler qorantasında dünyağa keldi. 18 mayıs 1944-te, altı yaşında ekende onı, bütün qırımtatar halqnı kibi sürgün ettiler.

Muallim, Namangan pedagogik institutından mezun oldı, mektepten evel ve mektep müessiselerinde çalıştı. 

Dilâra abla qocası Enver ağa Bariyevnen beraber eki qız ve bir oğlunı terbiye etip, aliy oquv yurtlarında oqumağa imkân temin ettiler.

Dilâra ablanıñ ömürinde ayrı quvançnı yedi torunnıñ sevgisi bere edi. 

Dilâra abla Bariyeva qocası Enver ağanen beraber qırımtatar milliy areketniñ saflarına 1960-lı yıllarında qoşuldılar. Bariyevlerniñ qorantası sürgün yerlerinden Qırımğa 1990-lı yıllarnıñ başında qayttı. 

Merametli ve inayetli, öz halqınıñ taqdirini samimiyet ile qayğırğan Dilâra abla muhtac olğan semetdeşlerine er daim yardım ve destek köstermege tırışa edi. Qırımnıñ Rusiye tarafından zemaneviy işğali devirinde Dilâra alba, öz ilerilegen yaşına ve zayıf sağlığına baqmadan, qanunsız mahkemelerniñ oturışlarına qoşula edi. Bunıñnen o, diger semetdeşlerimiznen beraber, rus işğalciler tarafından qanunsız basqıncılıqqa oğrağan qırımtatarlarına maneviy yardımnı bere edi.  

Qırımtatar Milliy Meclisi Dilâra abla Bariyevanıñ vefatı sebebi ile merhumeniñ qocası Enver ağa Bariyev, evlâtları Tamila, Gülnara, Eskender ve diger aqrabalarına eñ teren ve samimiy taziyelerni bildire. 

Allah rahmet eylesin!

Refat Çubarov,

Qırımtatar Milliy Meclisniñ reisi, 
Kyiv, 18 mart 2018 s.