Holokost fedalarını añma künü

27 January 2025

Qara qış ayınıñ 27-nde dünya Holokost fedalarını aña – bu, XX asırda insanlıqqa nisbeten nefret ideologiyası olğan natsizmniñ cinayetleri neticesinde insanlıqqa yüz bergen eñ deşetli felâketlerden biridir.

Ekinci cian cenki vaqtında natsistler millionlarnen adamlarnı yalıñız yeudi olğanları içün öldürdiler. Aynı zamanda, faşist Almaniyası tarafından işğal etilgen Ukrainada, farqlı malümatlarğa köre, 1,5 – 1,9 million yeudiy öldürildi.

XX asırda Ukraina, SSCBniñ kommunistik rejimi tarafından ukrain ve qırımtatar halqlarına qarşı yapılğan genotsid cinayetleri – Holodomor ve Sürgünlik – neticesinde de millionlarnen insan canını ğayıp etti.

Ekinci cian cenkinden soñ halqara toplulıqnıñ kelecek nesillerini cenk afetlerinden qurtarmaq ve barışıqlı yaşayış printsiplerine esaslanğan halqara işbirlik qurmaq ğayretlerine baqmadan, XXI asır keçmişniñ deşetli ananelerini devam ettire.

SSCBniñ kommunistik rejiminiñ insanlıqqa qarşı yapqanı cinayetler içün maküm etilmemesi ve qabaatlı insanlarnıñ cezalandırılmaması Rusiye Federatsiyasınıñ Ukrainağa qarşı arbiy tecavuzınıñ sebebi oldı, onıñ neticesinde endi on biñlernen insan elâk oldı, biñlernen Ukraina şeerleri ve köyleri viran etildi, millionlarnen tınç sakin evlerini terk etip, bütün dünyada qoruv qıdırmağa mecbur oldı.

Halqara Holokost fedalarını añma künü bizden, ayatımızğa yamanlıq, nefret ve cenk mefküresine yol bermemekte birleşmege talap ete. Holokost, Holodomor ve Sürgünlik fedalarını añma bizni Ukraina devletini qorçalamağa, topraq bütünligini ğayrıdan tiklemege ve endi 11 yıl devam etken cenkte Ukrainağa qarşı cinayet yapqan er kesni cezalandırmağa mecbur ete.

Holokost fedalarınıñ mekânı cennet olsun!

Refat Çubarov

Qırımtatar Milliy Meclisiniñ reisi

2025 senesi qara qış ayınıñ 27-si

Kıyiv ş.