New-Yorkta Meclis delegatsiyası qırımtatar cemaatınen körüşti

21.04.2025

Bazar künü, çiçek ayınıñ 20-nde BMTnıñ senelik Tamır halqları meseleleri daimiy forumı çerçivesinde New-Yorkta birinci iş künü, Qırımtatar Milliy Meclisiniñ Reisi Refat Çubarov, Qırımtatar Milliy Meclisiniñ azaı, Qırımtatar Maaliy Merkezi CTnıñ idare reisi Eskender Bariiev ve BMTnıñ Tamır halqları meseleleri daimiy forumınıñ maruzacısı Süleyman Mamutovnen beraber qırımtatar delegatsiyası faal Cemiyetnen AQŞ Qırımtatarlar assotsiyası evinde körüşti.

Pek sıcaq ve devamlı subet olıp keçti. Onıñ devamında dünyanıñ er bir yerinde bulunğan er bir Qırımtatarnı raatsız etken meseleler muzakere etildi – olar arasında öz toprağında, rusiye varvarları tarafından işğal etilgen Qırımda, tamır qırımtatar halqınıñ vaziyeti ve rusiye tecavuzcısına qarşılıq köstergende Ukrayinağa halqara yardım meselesi bar edi.

Körüşüv, işğal etilgen Qırımda rusiye tecavuzcılarınıñ Qırımtatarlar ve qavmiy Ukrayinlerge qarşı yapqanları taqipler ve repressiyalarnı köstergen qısqa video malümatınıñ taqdiminen faal subet şeklinde olıp keçti.