Dekabr 10-da Aqmescitte Halqara insan uquqları kününe bağışlanğan bütüqırım mitingi ötkerilecek

05 Dekabr 2011

TİLDE, FİKİRDE, İŞTE – BİRLİK!

İnsanlıq tarihında öz topraqlarından sürgün etilip Vatanına cenksiz, zorbalıqsız qaytıp kele bilgen halqlar çoq degil.

Qırımtatar halqınıñ birinci qurultayını darma-dağın etip, Qırım musulmanlarınıñ müftisi Noman Çelebicihannı vahşiyane öldürgenler, kollektivleştirüv devrinde yüzlernen qırımtatar köylerini talağanlar, on biñlernen ailelerni Sibir ve Uralğa sürgün etkenler, NKVD zindanlarında yüzlernen qırımtatar ziyalılarını qurşunlağan ve soñra 1944 senesi mayıs 18-de bütün halqnı cinaiy sürgünlikke oğratqan, ta 80-nci yıllarğa qadar ğurbet illerde zorlap tutqanlar, umumen HH asır devamında qırımtatar halqını maqsadlı şekilde yoq etmege tırışqanlar kendileriniñ pis vazifelerini tolusınen eda ettiler, dep bellediler.

Olar qırımtatar halqı bükülir, qırılır, yer yüzünden silinir, güzel Vatanımızğa saip olurlar, dep tüşündiler. Amma olar yañıldılar.
Biz, qırımtatarlar, misilsiz ğayıplarğa oğratılsaq da, iç bir şeyge baqmadan kene Vatanımızğa qaytıp keldik!

Biz birligimiz, ana toprağımızğa sadıqlığımız ve qırımtatar milliy areketi faalleriniñ cesürligi sayesinde sağ-aman qaldıq ve kene qaytıp keldik!
Qırımtatar halqı millet olaraq tek Vatanğa qaytıp saqlanacağını añlayaraq, Vatanımızğa kene saip çıqmaq içün er kes elinden kelgeni qadar hızmet etti. Lâkin qaytıp kelgen soñ da aqlarımıznı daa tiklep olamaymız, yarımada asıl halqınıñ inkişafını teminlegen mehanizmler daa yoqtır. Biz şunı da añlaymız ki, güzel yurtumızda qırımtatarlar ve diger millet vekilleri bahtlı-çastlı yaşaycaq künni özümizden ğayrı iç bir kimse yaqınlaştırıp olamaz. Demek, biz evelkisi kibi kene birlikli olmaq, milliy idare organlarımız – Qırımtatar halqınıñ qurultayı, Meclisi, regional ve yerli meclislerni pekitmek ve inkişaf ettirmek içün çalışmaq kerekmiz.

Qırımtatar halqınıñ maneviy birligini pekitüv – Qırım musulmanlarınıñ müftisi acı Emirali Ablayev yolbaşçılığında diniy idaresi, şu cümleden cemaat teşkilâtları ve bilhassa gençlerniñ ögünde turğan umumiy vazifemizdir.

Bir qaç künden soñ – dekabr 10 künü dünyanıñ cemi serbestlikni sevgen halqlar Halqara insan uquqları kününi qayd etecekler. Aynı bu künü 63 sene evel 1948 senesi dekabr 10 künü Birleşken Milletler Komiteti İnsan uquqlarınıñ halqara deklaratsiyasını qabul etti.

Bugünde-bugün qırımtatar halqı insan ve halqlarğa ait uquqlardan mahrum olğanda, qırımtatar tili ğayıp oluv telükesi altında bulunğanda, Ukraina erkânında milliy muhtariyat şekilinde devletçiligi tiklenilmegende epimiz umumhalq işi etrafında birleşmemiz ğayet müimdir.

2011 senesi dekabr 10 künü saat 11-de Aqmescitniñ merkeziy meydanında( Ukrain teatriya qarşısında) Halqara insan uquqları kününe bağışlanğan Bütünqırım mitingi ötkerilecek. Mitingniñ keçirilmesi Ukraina qanunları mücibi şeer akimlerinen añlaşıldı.

Qırımtatar halqınıñ Meclisi qırımtatar cemaat teşkilâtlarınen birlikte Siz ve Siziñ aileñizniñ azalarını qırımtatar halqınıñ birligi-beraberligi ve iradesini, onıñ serbestlik ve adalet ğayelerinen sadıqlığını numayış etecek Bütünqırım mitingine davet ete.

BİZİM ESAS TALABIMIZ – QIRIMTATAR HALQINIÑ AQ-UQUQLARINI HALQARA UQUQ AKTLARI, ŞU CÜMLEDEN İNSAN AQLARI UMUMİY DEKLARATSİYASI ESASINDA TİKLEMEK.

BİZİM BAŞ ŞİARIMIZ – QIRIMTATAR HALQINIÑ ULU EVLÂDI İSMAİL GASPRİNSKİYNİÑ “TİLDE, FİKİRDE, İŞTE – BİRLİK!” SÖZLERİDİR.

Miting 2011 senesi dekabr 10-da olacaq.

Miting saat 11.00- de başlanacaq.

Qırımtatar halqınıñ Meclisi

Qırımtatar cemaat teşkilâtları