Çubarov: Qırımda işğalciler cemaatnıñ qarşılığını bastıralar

26 Yanvar 2023

İnsanlarnıñ işğalcilerniñ qanunsız areketilerine (misal içün, mecburiy mobilizatsiya) qarşı çıqmamaları içün Qırımda rus işğalcileri, qırımlı cemaatnıñ qaşılığını bastırmağa tırışalar. Bugün yanvar ayınıñ 26-sında FREEДОМ telekanalınıñ canlı yayınında Qırımtatar Milliy Meclisiniñ başı Refat Çubarov bu aqqında haber berdi.

– Çünki şimdi er kes añlay ki, Qırım mıtlaqa azat etilecek. Ukraina devletine sadıq qalğan insanlar bunı büyük ümüt ve sabırsızlıqnen bekleyler. Başqaları ise, yani rus ceza organları ve yerli işdeşlikçiler bunı añlayaraq, cemaat üzerinde kontrol azamiy tarzda quvetleştirmege tırışalar, – dep ayttı.

2023 senesi yanvar ayınıñ soñundan yarımadada yerli sakinleriniñ rus ordusına keniş mobilizatsiyası beklenilir, dep Çubarov qayd etti.

– İnsanlarnıñ çıqışları ve memnüniyetsizliklerini nasıldır evelden yoq etmek içün rus işğalcileri olarnı daa çoq qorqutmağa tırışalar: yanvar ayınıñ 24-ünde qırımtatarlarnıñ evlerini kütleviy olaraq tinttileri, olardan altı kişisini tuttılar, ve tünevin olar üzerinde makeme ceryanı keçirildi, bu insanlarnıñ halqara terrorcılıq teşkilâtlarına sanki ait olmaları içün olarnı qabaatlaylar. Rusiye Telükesizlik federal Hızmeti, bütün tutulğan kişilerniñ Kıyivden ukrain mahsus hızmetlerinden emirlerni alğanlarını ilân etmege aşıdı, – dep Refat Çubarov bildirdi.

Yanvar ayınıñ 24-ünde Qırımnıñ şimalinde Canköy ve Canköy rayonında rus quvetçileri, qırımtatarlarnıñ, şu cümleden  Blijnegorodskoye köyündeki Ekrem Kroş, Timofeyevka köyündeki Ayder Asanov ve Refat Seydametov, Dneprovka köyündeki Osman Abdurazakov, Canköydeki Leman Zekiryayev ve Halil Mambetovnıñ evlerini tinttiler. Aqmescitteki Kıyiv rayonı makemesi olarnı yanvar ayınıñ 24-üne qadar epis etti.

Yanvar ayınıñ 25-inde işğal etilgen Aqmescit şeerinde Kıyiv rayonı makemesiniñ binası yanında “uquq qorçalayıcı organlar”nıñ işçileri, keçenlerde epis etilgen qırımtatarlarnı destek etmege ketken 34 kişini tuttı.