Cınğız Dağcı vefat etti

24 Sentâbr 2011

Elvida, öz yurtuna ömür boyu asret qalğan büyük zat !

Milliy edebiyatımız, medeniyetimiz, maneviyatımız büyük coyuqqa oğradı – 22-sentâbrde Londonda türkiy dünyanıñ eñ körümli ve eñ semereli çalışqan, em de dünyaca tanılğan yazıcılardan biri, çoq istidatlı nesirci ve romancı, özüni bütün ömür qırımtatar is etken ve Vatanınıñ taqdirini qayğırğan insan, cetemen erbabımız Cınğız Dağcınıñ yüregi, o, 92 yaşqa aylanğan bir çağında, uruvdan toqtadı.

İcret yolları onı İngiltereniñ paytahtına ketirmesinden evel, yazıcı felekniñ çemberinden keçe, defalarca ölümniñ pancasına tüşe, lâkin ondan qurtula ve böyle közaydınnıñ neticesi yigirmiden ziyade çıqqan kitapları ola.

O, yazğan ve bediiy seviyesi ğayet yüksek olğan eserlerniñ tek adılarına tek bir nazar taşlasaq, biz, Cınğız ağa ne derecede vatanperver, milletsever icatkâr şahs olğanını köre bilemiz. “Yansılar”, “Anama mektüpler”, “Qorqunç yıllar”, “Yurtunı ğayıp etken adam”, “Olar da insan edi”, “O topraqlar bizim edi”, “Badem dalına asılı sabiyler”, “Ölüm ve qorqu künleri”, “Biz beraber keçtik bu yolnı”… Bu er ceetten büyük eserler ait devir vaqialarnı aks etip, halqımıznıñ facialı taqdirini sanat vastalarınen tesirli, vesiqalı şekilde ifade etmekteler.

Cınğız Dağcı 1920 senesi 9-martta Yalta civarındaki Qızıltaş köyünde dünyağa kele ve oña Qırımda tek 21 yıl yaşamağa qısmet ola. Lâkin edip, bütün añlı ömürini yat ilde keçirse de, onıñ yazğan aman-aman er bir kitabı, er bir satırı o, asret olğan doğmuş ve Qızıltaş, Gurzuf, Aqmescit kibi yaşağan yerlerinen, candan da tatlı Vatanınen bağlı edi.

Onıñ edebiy eserleri halqımıznıñ, bunıñnen beraber, bütün türkiy aleminiñ eñ qıymetli, eñ oqunaqlı, eñ emiyetli ve teren tesir etken mirası sırasında ebediy turacaq, parlaq hatırası qalplerimizde daima saqlanacaq.

Büyük vatandaşımız Cınğız ağa Dağcı vefat etkeni munasebetinen onıñ yaqınlarına, onı oquğan ve icadına sevda olğan mühlislerine teren taziye bildiremiz ve baş sağlığı tileymiz.

Alla rahmet eylesin!

Qırımtatar Milliy Meclisi

Bütün dunya qırımtatar kongresinin Koordinatsion şurası