Çingenelerniñ aqları Avropa Şurasında muzakere etildi

02 April 2012

Avropa Şurası Parlament Assambleyası Qaçaqlar, köçüv ve keçici şahıslar boyunca komitetniñ 2012 senesi mart 29-da Brüsselde olıp keçken toplaşuvınıñ baş mevzularından biri Avropa memleketlerinde çingenelerniñ aq-uquqları meselesi oldı. Toplaşuvnıñ işinde AŞPAnıñ çeşit devlet deputatlarından ğayrı Avropadaki çingeneler birleşmeleriniñ davet etilgen liderleri de iştirak ettiler.

Avropa Şurası Parlament Assambleyasında(AŞPA) Ukrainanıñ vekili olaraq çıqışta bulunğan Mustafa Cemilev Qırım çingeneleriniñ facialı taqdiri aqqında ikâye etti. Cenk vaqtında almanlarnıñ ekinci cınıslı halqlar aqqındaki ırqçılıq nazariyesine köre Qırım çingeneleri de yoq etilecek ediler. Lâkin, olarnıñ pek çoqunı qırımtatarlar qurtardılar. Soñra çingeneler de 1944 senesi qırımtatar halqınen beraber sürgün etildiler.

Öz maruzasında M. Cemilev qırımtatar cemiyetine tolusınen qarışqan qırımlı çingenelerniñ, bunıñ kibi de Türkiyede bütün eali kibi aq-uquqlarğa malik, Türkiyeniñ medeniy ve cemaat ömürinde faal iştirak etken çingenelerniñ misalinde bazı Avropa devletlerinde çingeneler serseriylik, tilencilik kibi illetlerge meyil bereler, degen fikirge qatiyen qarşı çıqtı.

Munaqaşa neticeleri boyunca Komitet Avropada çingenelerniñ vaziyeti aqqında Almaniya parlamentiniñ deputatı Anetta Gross tarafından azırlanğan memorandumnıñ leyhasını tasdiqladı. Memorandumda kütleviy informatsiya vastaları çingene halqı aqqında tarqatqan menfiy malümat, çingenelerni aqsımlav, bunıñ kibi de soñki vaqıtta olarnı bazı Avropa devletlerinden (Frenkistan, Almaniya, İtaliya” sürgün etüv alları keskin qaralanmaqta.

Aynı şu künü Avropa Şurası İnsan aqları boyunca komissar Tomas Hammerberg Belçikanıñ “Avropa sedası” (“EuropeanVoice”) gazetasında Avropa çingenelerge nisbeten aqsız sert areketlerde bulunğanını tanımaq ve kelecekte bu kibi areketlerge yol bermemek aqqında beyanatnen çıqtı.