Çiygöz, Qırım meselesinde tamır halqını unutmaq mümkün olmağanını tüşüne

21 March 2025

Qırımtatar Milliy Meclisiniñ reisiniñ muavini, Ukraina halq mebusı Ahtem Çiygöz Ukraina prezidenti Volodımır Zelenskıynıñ saban ayınıñ 20-nde Osloda Norvegiya baş naziri Yonas Gar Sterenen keçirilgen matbuat konferentsiyası vaqtında Qırım aqqında aytqanlarını izaatladı.

Matbuat temsilcileriniñ suallerine cevap berip, Prezident Zelenskıy, Donald Trump ile subetinde oña Qırım – “yekâne tabiat, bizim ayırılmaz qısmımız, bizim ukrain yarımadamız” olğanını aytqanını bildirdi. Ukrainalılar olmadan Qırım öle, çünki bütün logistika esas Ukrainanen bağlıdır. Suv, logistika. Qırım – yekâne tabiat, bu turizmdir. Turizm içün eñ müim şey nedir? Turistler. Qırımğa 11 yıldır turistler kelmey. Qırımğa yazda 3 million turist kele edi. Eki million sekiz yüz biñ – ukrainalılar edi”.

Ahtem Çiygözniñ fikirince, Ukraina akimiyetiniñ Qırımnen bağlı kommunikatsiyasına yanaşuvı, anda tamır qırımtatar halqı unutılğanı, qabul etilmez.

“Qırımnı tek yekâne tabiatnen turistik topraq olaraq körmek ve Ukrainanen bağlılığı ve demokratik degerlikleri sebebinden işğalci tarafından daimiy telükeler ve terror altında bulunğan bütün qırımtatar halqınıñ vatanı olğanına diqqat ayırmamaq – meseleniñ özegini körmemezlikke urmaqtır!”, – dep o, Facebook saifesinde yazdı.

Meclis reisiniñ muavini şunı da qoştı ki, Qırımnıñ işğali aqqında aytmaq mümkün degil ve 1944 senesi Qırımnıñ tamır halqını yoq etmek maqsadınen yapılğan Stalin repressiyaları ve sürgünlik-genotsid, em de Rusiyeniñ işğalni qabul etmegenlerge qarşı yapqan cinayetleri aqqında aytmamaq mümkün degil, çünki rusiye tek halqara işğal ve cenk qaidelerini degil de, insan aqları ve serbestligini de boza.

“Bu esas mesac olmalı, çünki bu halqara uquq qaidelerine ve bütün halqara institutlarnıñ, hususan AQŞnıñ, tamır halqlarınıñ aqlarını qorçalamaq mecburiyetine esaslana. Avropa devletleri de, AQŞ da Qırımnıñ işğali qanunsız olğanını añlatqan ve qırımtatarlarnıñ, Qırımnıñ tamır halqı olaraq, öz Vatanına aqqı olğanını qayd etken rezolütsiyalarnı qabul ettiler. Eger de biz bu hususiyetni açıq beyanatlarımızda körmesek, ortaqlarımız bizni añlamazlar”, – dep Çiygöz qayd etti.

Halq mebusı şunı da qayd etti ki, Qırım – bu tek tabiat degil ve tek ticaret yapıla bilecek bir topraq degil:

“Bu büyük cenk Qırımdan başlandı, ve Qırım saqlanılmasa, ne Ukraina, ne de dünyada adaletli barışıq olur. Qırım – bu bölgeniñ telükesizliginiñ timsali ve anahtarıdır, halqara uquq içün bir sınavdır, ve bu Ukraina ve bütün medeniy dünyanıñ mesüliyetidir. Ve onıñ qıymetini topraq ve tabiatnıñ hususiyligine bağlamaq – serbest demokratik dünyanıñ esas qıymetlerine hainlik etmektir”.