Cengiz Dağcınıñ hatırasına dua

10 Noyabr 2011

2011 senesi noyabr 10 künü Qırımtatar halqınıñ Meclisi Qırım musulmanlarınıñ müftiliginen beraberlikte büyük qırımtatar yazıcısı Cengiz Dağcı tuvğan köyü Qızıltaşta defn etilgenine 40 kün tolğanı munasebetinen “Marakand” restoranında dua merasimini keçirdi.

Cengiz Dağcınıñ hatırasını añmaq içün duağa yazıcınıñ soy-aqrabaları. Qırımtatar halqı milliy areketiniñ veteranları, Meclis vekilleri, çeşit cemaat teşkilâtlarınıñ azaları, Türkiye Cumhuriyetiniñ Aqmescitteki fahriy konsulı Seyran Osmanov, bunıñ kibi de QMPU ocaları, yazıcı ve şairler keldiler.

Qırım musulmanlarınıñ müftisi haci Emirali Ablayev öz Vatanını dünyağa tanıtqan ve ömüriniñ soñki daqqasınace Qızıltaşnı hatırlap yaşağan Cengiz Dağcınıñ ruhuna dua oqudı.

Cengiz Dağcı aqqında hatırlavlarınen paylaşqan Meclis reisi Mustafa Cemilev şunı qayd etti ki, qırımtatar halqınıñ faciası aqqında bütün dünya yazıcınıñ romanları sayesinde bildi. “Qırımtatar halqı bütün nesilleriniñ borcu – eserlerinen Vatannı sevmege ögretken yazıcınıñ bediiy asabalağını ögrenmektir”, – dedi M.Cemilev.

Meclis reisi Cengiz Dağcınıñ ömürlik arzusını yerine ketirerek, onı Vatanda, doğğan Qızıltaş köyünde defn etilmesini boynuna alğan Türkiye Cumhuriyetine tekrar teşekkür bildirdi.

Malümat: Büyük qırımtatar yazıcı Cengiz Dağcı 2011 senesi sentâbr 22 künü Londrada vefat etti. Yazıcınıñ vasiyeti, bunıñ kibi de onıñ doğmuş qardaşı Ayşe hanım ve yaqın aqrabalarınıñ muracaatları yerine ketirilip, Cengiz Dağcınıñ cenazesi 2011 senesi oktâbr 2-de Aqmescitteki Kebir camide qılındı. Yazıcı Yalta civarında doğğan Qızıltaş köyünde defn etildi.