Celâl Türkiye jurnalistlerine rusiye tarafından qırımtatarlarnıñ taqip etilüvni añlattı

10 Oktâbr 2024

_{Foto Vasıl Bodnar}

Türkiyege ziyaret vaqtında Meclisniñ reisiniñ birinci muavini, rusiye yarımadanıñ tamır halqı içün “kefiyetli yaşayış şaraiti” aqqında halqara toplulıqqa yalan aytıp, qırımtatarlarğa qarşı nasıl areket etkenini tarif etti. Nariman Celâl ve Türkiye Cumhuriyetindeki Ukraina Elçisi Vasıl Bodnar yerli ve halqara kütleviy haber vastalarınen körüştiler.

“Qırımda resmiy olaraq 220 siyasiy mabüs qala, olardan 132 – qırımtatardır. Bu, Rusiye qırımtatarlarğa qarşı yapılğan taqipniñ belli olğanını köstere. Qırımdaki siyasiy mabüsler “akimiyet”ke qarşı çıqqan ya da “akimiyetni zapt etmege” tırışqanlar degil, olar adaletsizlikke ve tuvğan toprağınıñ işğaline qarşı küreşken insanlardır”, – dep bildirdi Ukrinform.

Onıñ aytqanına köre, Qırımdaki vaziyet pek ağır. Rusiye işğalli “akimiyeti” halqara toplulıqnı aldatıp, qırımtatarlar yarımadada “yaşayış şaraitinden memnün” olğanını iddia ete, amma aksine, bütün qorantalarnı taqip ete. Qırımtatarlar qorqu içinde yaşaylar ve Rusiye Federatsiyasınıñ olarğa qarşı yapqanı cinayetleri aqqında aytmağa qorqalar, çünki bu telükelidir.

“İnsanlarnı alıp ketip, FSBde sebepsiz uzun müddetke tutqanlar bar. Olarnı anda işkencege oğratalar, amma soñra bunı tek bir qaç kişi ayta. Menimce, Qırım serbest olacağına ve Ukraina terkibine qaytacağına qadar böyle vaziyet devam etecek”, – dedi Meclisniñ reisiniñ muavini.

Onıñ qayd etkenine köre, apis şaraiti halqara uquq qaidelerine uymay, Rusiye apishanelerinde apishanede alğan hronik hastalıqları olğan, ölümge yaqın olğan siyasiy mabüsler bar, olarnı Rusiye qanunlarına köre bile azat etmek kerek.

“Deñişüv aqqında añlaşmaq pek qıyın. Rusiye halqara uquqqa iç bir alâqası olmağanını köstere. Ve Ukrainağa qarşı tecavuz açıq-aydın isbatlana. Şunıñ içün Ukraina vatandaşlarını qorçalamaq içün tek yol – bu cenkte ğalebe qazanmaqtır. Ukrainağa Qırımnı Rusiyege bermege ve cenkni toqtatmağa teklif etilgenini sıq-sıq eşitemiz. Lâkin Rusiyeniñ işğal etilgen Qırımda vatandaşlarımızğa nisbeten munasebetini bilip, olarnı bu vaziyette qaldırmağa aqqımız yoq”, – dep qayd etti Celâl.