VI Milliy Qurultay Teftiş komisyonı toplaşuvınıñ № 4 PROTOKOLI

VI Milliy Qurultay Teftiş komisyonı toplaşuvınıñ 
№ 4 PROTOKOLI

Qasım (noyabr) 13, 2013 s. 

İştirak ettiler: VI Milliy Qurultay Teftiş komisyonın 7 azasından 4-ü 
Toplaşuvnıñ reisi: Ali bey Özenbaş 
Toplaşuvnıñ kâtibi: Emir-Asan bey Umerov 

Kün tertibi 

1. Milliy Meclis informasyon hızmetiniñ diqqatını Milliy Meclis resmiy saytınıñ (http://qtmm.org/ru) qırımtatarca ve ukraince variantları malümatnen toldurılmaq kerekligine celp etmek. Al-ı azırda işbu sayt ancaq rus tilindeki malümatlarnen donatıla. 

2. Qasım 22-de, 2013 s. olıp keçecek Milliy Meclis idareleri rehberleriniñ regional meclislernen qararlaştırılğan kenişletilgen seminar-toplaşuvda Milliy Meclis idareleriniñ ve regional meclislerniñ işini aşağıdaki meselelerge baqqan bölüklerge paylaştırmaq: 

a) Yerli meclislernen çalışacaq bölük. Bu bölük yerli meclislerge regional meclislerniñ qararlarını, bunıñ kibi de, Milliy Qurultay ve Milliy Meclis qararlarını yetkizecek ve olarnıñ ömürge keçirilmesine nezaret etecek. Bundan ğayrı, milliy müitni saqlaycaq ve onı inkişaf ettirecek (ana tilinde qonuşmaqnı teşviq etüv, milliy sanatqa, qırımtatar kütleviy matbuat vastalarına, qırımtatarca oqumağa, teleyayınlar seyir etmege ve ilâhrige meraq doğuruv); 

b) Deputatlarnen, şeer, qasaba ve köy şuralarınen çalışacaq bölük (yerli akimiyetniñ saylavcı semetdeşlerimiz içün müim ve kerekli qarar ve ükümlerni qabul etüvlerine, olarnıñ aqlarını qorçalavlarına teşviq etmek); 

v) İmamlar, mollalar ve din cemiyetlerinen çalışacaq bölük (yuqarıda añılğan maqsatlarğa yetmek içün umumiy siyasetni koordine etmek). 

3. Teftiş komisyonınıñ toplaşuvları ve alğan qararlarını, vaqıt keçiktirmeden, kütleviy matbuat vastalarına (“Qırım” ve “Avdet” gazetaları, QHA) bildirmek. 

Muzakere etilecek birinci mesele boyunca: 

Sözge çıqtı: Emir-Asan bey Umerov. O, Milliy Meclis resmiy saytınıñ (http://qtmm.org/ru) al-ı azırda ancaq rus tilindeki malümatlarnen donatılğanını köz ögüne alıp, Milliy Meclis informasyon hızmetiniñ diqqatını işbu saytnıñ qırımtatarca ve ukraince variantları malümatnen toldurılmaq kerekligine celp etmege teklif etti. Qasım 22-de, 2013 s. Milliy Meclis idareleri rehberleriniñ regional meclislernen qararlaştırılğan kenişletilgen seminar-toplaşuvda bunı aks etken beyanatname taqdim etilmesini teklif etti. 

Rey berildi: rey birliginen teklif qabul körüldi. 

Qarar berildi: Milliy Meclis idareleri rehberleriniñ regional meclislernen qararlaştırılğan kenişletilgen seminar-toplaşuvda Milliy Meclis informasyon hızmetiniñ diqqatını Milliy Meclis resmiy saytınıñ (http://qtmm.org/ru) qırımtatarca ve ukraince variantları malümatnen toldurılmaq kerekligine celp etmek içün beyanatname azuırlanılıp taqdim etilsin. 

Muzakere etilecek ekinci mesele boyunca: 

Sözge çıqtı: Ali bey Özenbaş. O, qasım 22-de, 2013 s. olıp keçecek Milliy Meclis idareleri rehberleriniñ regional meclislernen qararlaştırılğan kenişletilgen seminar-toplaşuvda Milliy Meclis idareleriniñ ve regional meclislerniñ işini aşağıdaki meselelerge baqqan bölüklerge paylaştırmaqnı tevsiye etmege teklif etti: 

a) Yerli meclislernen çalışacaq bölük. Bu bölük yerli meclislerge regional meclislerniñ qararlarını, bunıñ kibi de, Milliy Qurultay ve Milliy Meclis qararlarını yetkizecek ve olarnıñ ömürge keçirilmesini nezaret etecek. Bundan ğayrı, milliy müitni saqlamaq ve onı inkişaf ettirecek (ana tilinde söylenmekni teşviq etüv, milliy sanatqa, qırımtatar kütleviy matbuat vastalarına, qırımtatarca oqumağa, teleyayınlar seyir etmege ve ilâhrige meraq doğuruv); 

b) Deputatlar ve şeer ve köy şuralarınen çalışacaq bölük (yerli akimiyetniñ saylavcı semetdeşlerimiz içün müim ve kerekli qarar ve ükümlerni qabul etüvlerine, olarnıñ aqlarını qorçalavlarına teşviq etmek);

v) İmamlar, mollalar ve din cemiyetlerinen çalışacaq bölük (yuqarıda añılğan maqsatlarğa yetmek içün umumiy siyasetni koordine etmek). 

Rey berildi: rey birliginen teklif qabul körüldi. 

Qarar berildi: Milliy Meclis rehberiyetiniñ regional meclislernen qararlaştırılğan kenişletilgen seminar toplaşuvda Milliy Meclis idareleriniñ ve regional meclislerniñ işini mezkür bölüklerge paylaştırmaq tevsiyesini aks etken beyanatname azırlanılıp, işbu toplaşuvda taqdim etilsin. Bu vazife Teftiş komisyonınıñ reisi Ali bey Özenbaşqa avale etilsin. 

Muzakere etilecek üçünci mesele boyunca: 

Sözge çıqtı: Aziz bey Reşitov. O, Teftiş komisyonınıñ toplaşuvları ve alğan qararlarını, vaqıt keçiktirmeden, kütleviy matbuat vastalarına (“Qırım” ve “Avdet” gazetaları, QHA) bildirmege teklif etti. 

Rey berildi: rey birliginen teklif qabul körüldi. 

Qarar berildi: Teftiş komisyonınıñ toplaşuvları ve alğan qararları, vaqıt keçiktirmeden, kütleviy matbuat vastalarına bildirilsin. Bu vazife Emir-Asan bey Umerovğa avale etilsin. 

Toplaşuvnıñ reisi: / Ali Özenbaş / ………. 
Toplaşuvnıñ kâtibi: / Emir-Asan Umerov / …….