Canköy ve Bağçasaraydaki tintüvler vaqtında tutulğanlarğa qorçalayıcı tedbir saylandı

06 Mart 2024

İşğal etilgen Aqmescitteki Kıyiv rayon makemesi, saban ayınıñ 5-inde işğal etilgen Qırımda yañı kütleviy tintüvlerden soñ rus quvetçileri tarafından tutulıp qapatılğan altı qırımtatar faalcisine ve diniy erbapqa qorçalayıcı tedbirni sayladı.

“Qırım birdemligi” bu aqqında haber berdi.

Bildirildi ki, bütün makeme oturışları qapalı şekilde keçirildi. Yaqınları resmiy rica yazğanlarına baqmadan bile olarnı yibermediler.

Eski imam Remzi Kurtnezirovğa ev tevqifi şeklinde qorçalayıcı tedbir saylandı.

Makeme, faalci Ali Mamutovğa bu sene mayıs ayınıñ 4-üne qadar SİZOda tevqif etmege üküm çıqardı.

İşğal makemecisi, Nariman Ametovğa 1 ay ve 29 künge, yani bu sene mayıs ayınıñ 5-ine qadar, tevqif etmege üküm çıqardı.

İşğal makemesi Arsen Kaşka, Enver Halilaev ve Vayit Mustafaevge bu sene mayıs ayınıñ 5-ine qadar SİZOda tevqif etmege qarar berdi.

Hatırlatamız ki, saban ayınıñ 5-inde işğal etilgen Qırımda yañı kütleviy tintüvler dalğası keçti. Bağçasarayda “Qırım birdemligi”niñ faalcileriniñ evlerinde, Canköy rayonında diniy erbaplarının evlerinde taqiqat tedbirleri keçirildi. Bundan soñ 10 qırımtatar adamını alıp, işğal etilgen Aqmescitteki polis bölügine kettiler.