Büyük Cuma Cami leyhasınıñ eskizleri cemaat tarafından baqıp çıqıldı

20 Sentâbr 2011

Cuma caminiñ eñ yahşı leyhası içün evel ilân olunğan yarış çerçivesinde  tüşken  14 leyha eskizleri İ. Franko  adına Qırım Cumhuriyet universal kitaphanesiniñ salonında bir afta devamında cemaatçılıqnıñ diqqatına avale etilgen edi. 2011 senesi sentâbr 19 künü sergi müddeti soñuna yetkende Büyük Cuma cami qurucılığı boyunca Nezaret keñeşiniñ nevbetteki toplaşuvı olıp keçti.  Toplaşuvnı Keñeşniñ eş reisleri Qırımtatar halqı Meclisiniñ reisi Mustafa Cemilev  ve Qırım musulmanlarınıñ müftisi haci Emirali Ablayev alıp bardılar.

Nezaret keñeşiniñ azaları sergini ziyaret etken insanlar toldurğan anketalarınıñ neticelerini muzakere ettiler.  Keñeş azası Refat Çubarovnıñ haber bergenine köre, soravda iştirak etken semetdeşlerimizniñ ekseriyeti Cuma Camini ananeviy qırımtatar mimariy üslüpleri boyunca qurulmasını közde tutqan eskizlerni seçip aldılar. Eskizlerge qıymet kesken semetdeşlerimiz  № 7,  № 4  ve  № 2   kibi belgilengen eskizlerge çoqça rey bergenler.

Anketalarnı tolduruv vastasınen keçirilgen cemaatçılıq soravınıñ neticelerinen tanış olğan keñeş azaları kene sergi salonına keçip anda taqdim etilgen  14 eskizniñ er birini tafsilâtlıca muzakere ettiler.

Keñeş azaları  muzakere neticelerine köre eki kün içinde er bir leyha boyunca  öz fikirlerini yazma şekilde bildirmek qararına keldiler.  Nezaret keñeşi erkânınıñ cemi azaları ile birlikte  sentâbr 22-de toplanmaq ve olıp keçken yarış neticeleri boyunca qarar almaqnı añlaştılar. Munaqaşa ketişatı şunı kösterdi ki, yarışnıñ ekinci basqıçı ilân etilip, onda Nezaret keñeşiniñ azaları teklif etken leyhalarnıñ müellifleri iştirak eterler.