Bütünqırım matem mitinginiñ iştirakçilerine qırımtatarlarnıñ aqları içün küreşçi, general Pötr Grigorenkonıñ oğlu, babasınıñ işini devam etken Andrey Grigorenko hıtap etti

19 Mayıs 2012

“Bugün meni eki türlü duyğu sardı, – dedi Andrey Grigorenko Bütünqırım matem mitinginde. – Bir taraftan qırımtatar halqınıñ Vatanğa qaytmaq aqqı içün küreşken yıllarımızda çekken accılarımız aqılıma tüşti. O zaman bazıda biz tiri ekenimizde bunı körecegimizge inanmay edik. Diger taraftan ise halq bugün artıq Vatanğa qaytqanı ve yerleşkenini körip yürekten sevinem. Ebet men añlayım, problemler daa çoq, eskileri çezilmegende, ep yañıları peyda olmaqta.

Lâkin men qırımtatarlarnıñ ve olarnıñ dostlarınıñ zorbalıqsız, demokratik alınıp barılğan büyük areketini körem. Ve bizim areketimiz zorluq ve cinayet yolunı tutqanlarnıñ areketinden farqlı ve çastlıdır”