Bursa dernegi İslâm Terek rayonında yañı cami quracaq

11 Dekabr 2013

Dekabr 11 künü İslâm Terek rayonınıñ Küleç Meçit köyünde qurulacaq caminiñ temeline taş qoyuv merasimi olıp keçti.

Cami Bursa qırımtatar medeniyet ve yardımlaşma derneginiñ maddiy qoltutuvında qurulacaq.

Merasimde Qırımtatar halqı meclisiniñ reisi Refat Çubarov, Qırım musulmanları Müftiyiniñ muavini Ayder İsmailov, Bursa qırımtatar medeniyet ve yardımlaşma derneginiñ reisi Adnan Süyen, İslâm Terek regional meclis reisi Ekrem Abdulvatov, İslâm Terek rayonınıñ imamı Nariman Koroglu, Küleç Meçit köy imamı Emirulla Emirveliyev, regional ve yerli meclis azaları, yerli sakinler iştirak ettiler.

Tantanalı merasim Küleç Meçit köy imamı Emirulla Emirveliyev oquğan duadan başlandı.

Toplanğanlarnı Qırım musulmanları Müftiyi acı Emirali Ablayevniñ adından müftiy muavini Ayder İsmailov selâmladı. Bursa qırımtatar medeniyet ve yardımlaşma derneginiñ reisi Adnan Süyen şahsında dernek azalarına bu hayırlı işleri içün teşekkür bildirip, bu kibi teşebbüslerge Qırımnıñ camilerge muhtac diger köylerinde de sesleneceklerine ümüdinen paylaştı.

Adnan Süyen öz nevbetinde leyhağa köre köyde caminen birlikte İslâm ve Quran oquv derslerini keçirmek içün imam içün de ev qurulması planlaştırılğanını söyledi.

Meclis reisi Refat Çubarov öz çıqışında yerli sakinlerni cami qurucılığına qoltutmağa, cami açılğan soñ ise bu yerge balalarını ketirip olarğa İslâm esaslarını aşlamağa çağırdı.

Merasimden evel qurban çalındı. Tedbirniñ soñunda Müftiy muavini Ayder İsmailov dua oqudı.