BMT delegatsiyası resmiy ziyaretnen Mecliste bulundı

10 Fevral 2012

2012 senesi fevral 8 – 9 künleri Birleşken Milletler Teşkilâtı siyasiy işler departamenti ve BMT İnkişaf programmasını ğayrıdan tiklev ve iñqırazlarnıñ ögüni aluv boyunca büronı temsil etken BMT delegatsiyası Qırımda resmiy ziyaretnen bulundı.

2012 senesi fevral 9 BMT sistemasınıñ koordinatorı, BMT İnkişaf programmasınıñ Ukrainadaki daimiy temsilcisi Ölivye Adam reberliginde Qırımtatar halqınıñ Meclisine resmiy ziyaretnen kelgen BMT delegatsiyasını Meclis reisiniñ birinci muavini Refat Çubarov qabul etti.

Körüşüvde bunıñ kibi de BMT delegatsiyasınıñ azaları – BMT İnkişafı programmasınıñ Qırımdaki temsilciliginiñ reberi Adelin Göne, Birleşken Milletler Teşkilâtı siyasiy işler departamenti siyasiy meseleler boyunca üyken mütehassısı Çarlz Aniydoho, Birleşken Milletler Teşkilâtı siyasiy işler departamenti siyasiy meseleler boyunca mütehassısı Roman Şpak, BMT İnkişaf programması ştab kvartirası, iñqırazlarnıñ ögüni aluv ve ğayrıdan tiklev programm mütehassısı Anita Ernstorfer, Avropa ve Mustaqil Devletler Birligi departamenti, İnkişaf programmasını ğayrıdan tiklev ve iñqırazlarnıñ ögüni aluv boyunca bürosı, BMT ştab kvartirasınıñ tehnikiy mesleatçısı Razmik Panossân, BMT sisteması koordinatorı ofisi, insan inkişafı boyunca mesleatçısı Gaspar Bergman, BMT İnkişaf programması Qırımdaki vekâletliginiñ programm meneceri Qurtomolla Abdulğaniyev iştirak ettiler.

Qırımtatar halqı Meclisiniñ delegatsiyasını ise Meclis tışqı alâqalar bölüginiñ başı Ali Hamzin, Meclis Kâtibiyetiniñ reberi Zair Smedlâyev, Meclisniñ informatsion siyaset ve cemaat teşkilâtlarınen bağlanuv idaresiniñ başı Şevket Qaybullayev temsil ettiler.

BMT resmiy delegatsiyasınıñ ve Meclis azaları BMTniñ Qırımda inkişaf programmasınıñ faaliyetini ve bunıñ kibi de Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligini teminlev meseleleri boyunca halqara forumğa azırlıqnıñ ketişatını muzakere ettiler.
Qırım Yuqarı Şurası uzurında faaliyet köstergen İnsan havfsızlığı boyunca keñeş faaliyeti aqqında aytqan Refat Çubarov, mezkür keñeşni ğayrıdan qurmaq ğayesine qoltutaraq, cümleden şunı qayd etti: “Ümüt etem ki, çeşit siyasiy küçlerden bağımsız ekspertlerni celp etüv keñeş işiniñ semeresini arttırıp, onıñ tevsiyeleriniñ teren olmasını teminler”.

Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligini teminlev meseleleri boyunca halqara forum mevzusına keçerek, Refat Çubarov BMT sistemasınıñ koordinatorı, BMT İnkişaf programmasınıñ Ukrainadaki daimiy temsilcisi Ölivye Adamğa qoltutuvı içün teşekkür bildirdi.

Refat Çubarov qayd etti ki: “Şimdi Halqara forumnı azırlavnıñ müimden-müim basqıçlarından biri – OSCE milliy azlıqlarnıñ işleri boyunca aliy komissar Knut Vollebek ile Forumnıñ kün tertibi, maqsadı ve vazifelerini ve bu işke destek kösterecek ortaq teşkilâtçılarnen yani Avropa Birligi, Avropa Keñeşi, BMT ve Ukraina devleti ile çalışmadan beklenilgen neticelerni belgilemek işi başlandı. Meclis ise OSCE Aliy komissarınıñ ofisinen birlikte işlegen ait vesiqalar boyunca añlaştıq. Endi, tabiiy ki, çoq şey Ukraina devletiniñ pozitsiyasına bağlıdır. Biz ümüt etemiz ki, yaqın arada bütün bu meseleler çezilir ve 2012 senesi küzde Kiyevde Halqara forum keçirilir”.

Soñra, Refat Çubarov ve körüşüvde iştirak etken meclis azaları BMT delegatsiyasınıñ Qırımda milletlerara munasebetler vaziyeti, topraq meselelerine, qırımtatarlarnıñ idare saalarında vekâletligine dair suallerine cevap berdiler. Qırımda milletlera munasebetlerniñ vaziyeti muzakeresine yekün çekken Refat Çubarov subetdeşleriniñ diqqatını şuña celp etti ki, alâ daa devam etken adaletsizlikniñ baş sebebi “qırımtatar halqı sürgünligi ve on yıllarnen sürgünlik yerlerinde aqsımlanmasınıñ aqibetlerini yoq etüvge doğrultılğan qanunnıñ yoqluğıdır”.

BMT İnkişaf programmasınıñ Ukrainadaki daimiy temsilcisi Ölivye Adam BMTniñ milletlerara munasebetler saasında mürekkep meselelerni çezüvdeki müsbet tecribesini qayd etip, dedi ki: “Bu meselelerniñ Ukrainada – er angi resurslarnıñ yetip arttığı ülkede, köterilgeni men ve zenaatdaşlarımnı daima taaciplendirip keldi Bu munasebetnen ümüt etem ki, qırımtatarları ve Meclis milliy özgünligini saqlap qalmaq ve insan uquqlarını qorçalamaq işi oğrunda areket eterler”.

BMT sistemasınıñ Koordinatorı Ölivye Adam Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligini teminlev meseleleri boyunca halqara forum ğayesine qoltutqanını daa bir kere tasdiqladı.

Öz nevbetinde Refat Çubarov, BMT delegatsiyası azalarına muracaat eterken, BMTniñ Qırımdaki İnkişaf programmasınıñ rolü ve faaliyetiniñ neticelerine yüksek qıymet kesip, böyle dedi: “Delegatsiyañıznıñ terkibinde inqırazlarnıñ ögüni aluv ve ğayrıdan tiklev bürosınıñ hadimleri de bulunmaqtalar, demek biz doğru yoldan ketemiz. Çünki insanlar arasında iñqıraznıñ ögüni almaq, adalet yolundaki manialarnı keçmek qolay, amma dava aqibetinde bozulğan munasebetlerni tiklemek pek zor”.