BMT Aliy Komissarı İdaresiniñ Beyaz Rusiye, Moldova ve Ukrainadaki regional temsilcisi Oldrih Andrısek Halqara forum keçirilmesine keder etecek sebeplerni körmey

19.09.2012

Cenap Oldrih Andrısekniñ fikrince, zarur protsedura ve tehnikiy meseleler müsbet çezildi ve demek, Halqara forum çağırılması halqara seviyede ve Ukraina ükümeti seviyesinde küçlerni birleştirmek imkânını berir.

“Uzun yıllar devamında yerinden qıbırdamağan meselelerge qaytmaq imkânını bergen böyle tedbirniñ vaqtı çoqtan keldi, dep sayam, – dey eminliknen BMT Aliy Komissarı İdaresiniñ Beyaz Rusiye, Moldova ve Ukrainada regional temsilcisi Oldrih Andrısek.

2012 senesi sentâbr 18 künü Kiyevdeki “Hyatt” ötelinde Qırımtatar halqı Meclisiniñ yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler.

Esas maruzalarnen Qırımtatar halqı Meclisi yolbaşçılarınıñ Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüşüvinde Meclis reisi, Ukraina halq deputatı Mustafa Cemilev, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Qırım Nazirler Şurasınıñ reisi Anatoliy Mogilöv, “Qırım inkişafı vaqufı” hayriye teşkilâtınıñ prezidenti Rustem Ümerov, OSCE Aliy Komissarınıñ mesleatçısı Aleksandr Vinnikov, Halqara Forumğa azırlıq çerçivesinde Qırımdaki vaziyet aqqında esabat azırlav boyunca mustaqil ekspertler gruppasınıñ halqara koordinatorı Endrü Vilson çıqışta bulundılar.

Körüşüvge bunıñ kibi de Ukraina Prezidenti Memuriyetiniñ vekilleri, Prezitentniñ Qırımdaki daimiy temsilcisi Viktor Plakida, Ukraina tışqı işler nazirligi hadimleri ve Ukraina içtimaiy siyaset naziri davet etildiler. Körüşüv “Qırım inkişafı vaqufı” hayriye teşkilâtınıñ qoltutuvında keçirildi