«Biz avropalılarmız» areketiniñ iştirakçileri mayıs 18 künü Qırımtatar halqı sürgünligi qurbanlarınıñ hatırasına bağışlanğan “Qayğı ve Birlik daqqası”na qoşulacaqlar

15 May 2013

Mayıs 18 künü Kiyevde 11-nci kere Avropa künü qayd etilecek. Tedbirniñ resmiy qısmında Ukraina tış işleri naziri Leonid Kojara, Avropa Birliginiñ Ukrainada temsilciliginiñ başı Yan Tombinski, Avropa Birligi azaları olğan devletlerniñ elçileri, KGGA reisi Aleksandr Popov ve diger nufuzlı musafirlerniñ iştirak etmesi beklenile. “Biz avropalılarmız” areketiniñ iştirakçileri qırımtatar halqına göñüldeşlik bildirmek niyetinde mayıs 18 künü Kiyevde öz aktsiyaları keçken vaqıtta Qırımtatar halqı sürgünligi qurbanlarınıñ hatırasına bağışlanğan “Qayğı ve Birlik daqqası”na qoşulacaqlarını bildirdiler.

İçtmaiy ağlar ve media resurslar vastasınen areketniñ teşkilâtçıları Ukrainanıñ bütün sakinlerine muracaatta bulunıp, mayıs 18 künü qırımtatar halqına göñüldeşlik bildirerek saat 12.00-de bir qaç daqqağa toqtap, sürgünlikte ölgenler, Vatanğa qaytıp kelmegenlerniñ ruhuna dua oqumağa çağırdılar. Bundan da ğayrı “Biz avropalılarmız” areketiniñ iştirakçileri bu yılı Avropa kününi qayd etüv Ukraina sakinleri içün ayrıca emiyetke maliktir, çünki kün tertibinde Avropa Birliginen birleşme aqqında Añlaşma imzalav meselesi tura.

“Biz bilemiz ki, Avropağa yol – bu birinci nevbette devletniñ içindeki deñişmelerdir, – deyler areket iştirakçileri. Birk çoq insanlar, teşkilât ve müessiseler bu deñişmelerniñ olmasını kerçekleştireler. Biz er kesni aktsiyağa qoşulmağa ve öz istek ve muvafaqiyetleriñiz aqqında ikâye etmege davet etemiz”.