Birleşken Milletler Teşkilâtı Baş kâtibiniñ üyken mesleatçısı Robert Serri: Halqara cemaatçlıq Ukraina bütünligine qoltuta

05 Mart 2014

Bu aqta o, Meclis reisi Refat Çubarov ile mart 5 künü olıp keçken körüşüvde bildirdi.

Robert Serriniñ bildirgenine köre, o Birleşken Milletler Teşkilâtı Baş kâtibi Pan Gi Munnıñ şahsiy avalesini – yani Qırımda yüz bergen vaziyetniñ sebeplerini, inqirazdan çıquv yollarını tapmaq içün vaziyetni talil etmek işlerini eda ete. O, şunı da qayd etti ki, BMTniñ Ukrainadaki vaziyet boyunca üç toplaşuvınıñ da iştirakçileri Ukrainanıñ bütünligi ve birligine qoltutqanlarını kösterdiler. “Qırımtatar halqı yarımadada yetekçi ve birleştirici rol oynay, dep sayamız, – dedi R. Serri, halqara cemaatçılıqnıñ fikirini seslendirerek. Ve şunı da ilâve etti ki, yabancı devletniñ Qırımğa silâlı qoşunlarını kirsetmesine aslı da acet yoq edi”.

Birleşken Milletler Teşkilâtı Baş kâtibi üyken mesleatçısınıñ ricasına köre Refat Çubarov soñki künler içinde olğan vaqialarnı detaller ile tarif etip, Meclisniñ pozitsiyasını ve bu davadan, Ukrainanıñ bütünligini saqlap qalmaq printsipine esaslanğanı alda çıqmaq yolları hususında fikirini de beyan etti.

Robert Serri Meclisniñ pozitsiyasını maqullerken, teklif olunğan Mahsus deputat komissiyalarınıñ erkânı şekillengende ve söyleşmeler yapılğanda halqara cemaatçılıq ve elçiliklerniñ vekilleri de temsil etilmek kerekligini qayd etti. Bundan da ğayrı Robert Serri Birleşken Milletler Teşkilâtı Baş kâtibiniñ esas mesajlarını da yani Qırımda kerginlikni yatıştırmaq ve dialog qıdırmaq tevsiyelerini de bildirdi.

“BMT qurumları ve halqara cemaatçılıq bellisiz şahıslar tarafından devlet müessiseleri ve obyektlerniñ işğal etilmesinden kederlendiler, – devam etti R. Serri. – İnsan aqları hartiyasına köre BMT baş qaidesine riayet ete – er angi davalar tek tınç yol ve dialog vastasınen çezilmeli. Bundan da ğayrı, biz eminmiz ki, Kiyevdeki akimiyet Qırımnıñ qanuniy akimiyeti ile añlaşması zarur”.

Körüşüvniñ soñunda R. Serri Qırım ziyaretinden teessuratlarınen paylaştı. Cümleden, bugün özüni Qırım ükümetiniñ başı dep köstergen Sergey Aksönov ile körüşmek planlaştırılğan edi. Amma, belli olmağan sebeplerge köre körüşüv olmadı. Qırım Nazirler Şurası protokolından iç bir kimse Robert Serrige Aksönov onıñ ile körüşmege istemegeni aqqında haber bermedi. “Qırım ziyaretimniñ neticeleri aqqında Birleşken Milletler Teşkilâtı Baş kâtibi Pan Gi Munğa mıtlaqa esabat berecem, şu cümleden Sergey Aksönovnıñ BMT Baş kâtibi ofisiniñ hadimlerine munasebeti aqqında bildirecem”, dedi R. Serri.