Birleşken Milletler Teşkilâtı Baş kâtibiniñ İnsan aqları boyunca yardımcısı İvan Şimanoviçni Qırımğa kirsetmediler

13 Mart 2014

Bu aqta o, Meclis reisi Refat Çubarovğa telefon vastasınen bildirdi.

Mart 13 künü Birleşken Milletler Teşkilâtı Baş kâtibiniñ İnsan aqları boyunca yardımcısı İvan Şimanoviç Milliy Meclis reisi Refat Çubarovğa telefon açıp, Qırımğa mındaki vaziyetni ögrenmek ve çeşit taraflarnıñ vekillerinen körüşmek içün keletâqanda Qırım akimleri oña keder etkenlerini haber etti.

Meclis reisi Refat Çubarov İvan Şimanoviçke Qırımdaki vaziyetni añlatıp, regionda insan aqları bozulğanını söyledi.

İ.Şimanoviçniñ sözlerine köre, o BMT Baş kâtibine Qırımda insan aqları qaba şekilde bozulğanı aqqında mahsus esabat azırlaycaq. İvan Şimanoviç esabat işançlı menbadan alınğan malümatlarğa esaslanğanı ve Qırımdaki vaziyetni obyektiv şekilde tariflegenini qayd etti.

Birleşken Milletler Teşkilâtı Baş kâtibiniñ İnsan aqları boyunca yardımcısı İvan Şimanoviç şunı da ayrıca qayd etti ki, Qırımda tamır halqnıñ ve diger millet vekilleriniñ aqlarını teminlemek, meydanğa kelgen vaziyette insanlarnıñ canını qurtarmaq içün er şeyni yapmaq meramında.