“BİLGİ BAYRAMI”

01 Sentâbr 2011

Birinci sentâbr künü Ukraina mekteplerinde 4 million 500 biñ talebe, şu cümleden Qırımdaki 190 biñ talebe  içün birinci çañ qaqıldı.

Ukraina boyunca bugün 416 biñ birinci sınıf talebesi, şulardan Qırımda 17 biñ 900-i rale başına oturdı. 

Qırımtatar tasil hadimleri “Maarifçi” birleşmesiniñ reisi Safure Kacametova bergen malümatqa köre, 2011 senesi mart ayından Qırımnıñ qırımtatarlar toplu yaşağan bir sıra regionlarında 826 balanıñ ana-babaları balalarını qırımtatar tilinde oqutmaq istegini bildirdiler. Mekteplerde 59 milliy sınıf açmaq planlaştırılğan edi. 

Amma  23 mektepte 286 nefer qırımtatar balası içün çeşit sebeplernen birinci milliy sınıf açılmadı. Ana-babalarnıñ arizalarını birinci nevbette yerli akimler, yerli tasil bölükleriniñ ve mektep müdirleri red ettiler. Bu ise, grajdanlarnıñ Anayasada belgilengen uquqlarını bozuvdır

Lâkin, buña baqmadan Qırımnıñ 32 mektebinde 36 milliy sınıf  açılıp, 540 oğlan ve qızçıqlar qırımtatar tilinde oqup başladılar.

Olardan:

 – qırımtatar tilinde oqutılğan  15 mektepte 19 milliy sınıf (298 talebe) açıldı;

 – rus tilinde oqutılğan 17  ve 2, 3 tilli mepkteplerde 18 milliy sınıf açıldı(242 talebe)

Bugün Qırımnıñ bütün mekteplerinde tantanalı toplaşuvlar oldı. Talebelerni çeşit seviyedeki deputatlar, cemaatçılıq ve elbette ki ana-babalar samimiy hayırladılar. Barsın 2011-2012 oquv yılı, bir çoq problemlerge baqmadan, bala ve ocalarımız içün quvançlı olsun.