Belli yazıcımız Yusuf Bolatnıñ hatıra aqşamı

25 November 2012

2012 senesi noyabr 25-de saat 12-de Özbekistandaki qırımtatar “Avdet” medeniy merkezi tarafından belli qırımtatar dramaturgı, nesirci-romanisti, şaqa ikâyeler ustası olğan yazıcımız Yusuf Bolatnıñ hatıra aqşamı keçirildi.

Aqşamnı merkez reisi Nusret bey Cemilev açtı ve sözni Aliye Ametovna İmadinovağa berdi, özü ise Refat aga Ablayevnıñ cenazesige ketti. 
Aliye Ametovna İmadinova toplaşuvnı devam ‘etti ve söz nevbetini Aliye Osmanovnağa berdi. Çıqışını Eşref Şemi Zadeniñ “Baba vasiyetini unutmamalı” şiirinden başlağan Aliye Osmanovna Hurşut edipniñ icadı ve ömür yolu aqqında tafsilâtlı maruzasını taqdim etti. 

“Vetan” ansambliniñ reberi Zakir bey Aciosman yazıcınıñ eserlerinde raskelgen yırlarnı, avalarnı ustalıqnen yırladı ve çaldı.Stsenariy arasındaki şiirlerni ise Zekiye Abiyeva oqudı.

Yazıcınıñ qızları Gülnara ve Zarema Bolat babalarınıñ ayatı ve icadını aydınlatqan sergini numayış ettiler. Çırçıq şeerinden kelgen Yusuf Halilov yazıcınıñ şaqa ikâyelerini oqup, er kesni küldürdi. Soñra Özbekistan radiosında qırımtatar eşittirüvler diktorı ve muarririZera Rustemova halqımız ve Yusuf Bolatnıñ başından keçken çoq müsibetler, sınavlarnı qayd etip, er kesni ana tilinde lafetmege çağırdı. 

Aqşam devamında sevimli yırcımız Arsen Ametov yazıcınıñ sevgen yırlarını icra etti. 

Tedbirniñ soñunda söz yazıcınıñ qızlarına berildi. Zarema Bolat babasını sıcaq sözler ile hatırlayaraq, onıñ “Çeçek bayramı” ikâyesini oqudı. Babası pek nazik, yımşaq göñülli, er kesni acığanı, öz bahtını Vatanğa, halqına hızmette tapqanıı bildirdi.