Bariiev rusiyeni BMTdan çıqarmağa çağırdı

20 Aprel 2023

Çiçek ayınıñ 18-inde Nyü-York şeerinde keçirilgen BMTnıñ tamır halqları meseleleri muntazam forumında Qırımtatar Milliy Meclisiniñ azası Eskender Bariiev söz ayttı.

O qayd etti ki, devletlerarası çatışma şartında tamır halqlarınıñ vaziyeti aqqında meselege diqqat celp etmek müimdir.

Meclisniñ azası bildirdi ki, rusiyeniñ Ukrainağa qarşı arbiy tecavuzı neticesinde BMTnıñ Nizamnamesi, BMTnıñ tamır halqlarınıñ aqları aqqında deklaratsiyası, BMTnıñ iklim deñişmesi aqqında çerçive nizamnamesi bozulalar, Muntazam İnkişafnıñ Maqsatları yerine ketirilemez.

İşğal etilgen topraqlarda rusiye ve Ukrainanıñ tamır halqlarınıñ rus ordusına mecburiy mobilizatsiyası sebebinden tamır halqlarınıñ vekilleriniñ sağlığı ve ayatı telüke astındadır. Neticesinde tamır halqlarınıñ on biñlerce adamı elâk ola.

Çıqış yapqanda Bariiev rusiyeni cenk bitirmege ve ordusını Ukrainanıñ topraqlarından çıqarmağa çağırdı. Bundan ğayrı uquq qorçalayıcı, aza ülkelerine BMTda bir islâat teşebbüs etmege  ve rusiyeni BMTnıñ Telükesizlik Şurasından çıqarmağa muracaat etti.