Bağçasarayda yañi turistik merkez açildi

10 Iyün 2011

2011 senesi iyün 10 künü Bağçasarayda tantalı sürette Turistik informatsion merkez açıldı

Merkez Amerika Qoşma Ştatlarınıñ “Lokal investitsiyalar ve milliy raqiplik iqtidarlığı” (LİNK) Halqara inkişaf boyunca (USAID) leyhası Qırım ofisi ve Çehiyanıñ Ukrainadaki elçihanesiniñ maliyeviy yardımı sayesinde açıldı.

Merkezniñ açılış merasiminde Qırımtatar halqı Meclisiniñ azaları, cumhuriyet akimiyet organlarınıñ, Bağçasaray rayon devlet memuriyeti. Bağçasaray şeer şurası, Qırım turistik biznesiniñ vekilleri, Ukrainada çalışqan diplomatlar, şu cümleden Qırımda açılğan Baş ve Fahriy konsullıqlarnıñ reberli, Bağçasaray şeeriniñ musafirleri ve sakinleri iştirak ettiler.

Hayırlav ve regionda turizmni inkişaf ettirüv oğrundaki faaliyetinde Merkezge muvafaqiyetler tileginen Çehiya Cumhuriyeti Tışqı işler naziriniñ birinci muavini Yirji Şnayder, Qırımtatar halqı Meclisiniñ reisi Mustafa Cemilev, Amerika Qoşma Ştatlarınıñ “Lokal investitsiyalar ve milliy raqiplik iqtidarlığı” (LİNK) Halqara inkişaf boyunca (USAID) leyhası Qırım ofisiniñ direktorı Ceffri Lubbi, Qırım turizm ve kurortlar naziriniñ birinci muavini Aleksandr Liyev, Bağçasaray rayon devlet memuriyetiniñ reisi İlmiy Ümerov çıqışta bulundılar.

Qırım hanlığınıñ qadimiy tarihiy mekânında ötkerileyatqan tantananıñ iştirakçilerini selâmlağan Milliy Meclis reisi, Ukraina halq deputatı Mustafa Cemilev Bağçasaray sakinlerini Merkezniñ açıluvınen samimiy hayırladı. “Bağçasaray içün Turistik informatsion merkez açılmasınıñ emiyeti ğayet büyüktir, çünki bu, birinci nevbette turizmniñ inkişafına siltem olur ve Bağçasaray regionında yaşağan ealiniñ, milliy mensüpliginden qatiy nazar, eyiallılığını yükseltir. Ümüt etemiz ki, Merkez Qırımnıñ musafirlerini yarımada tamır halqı – qırımtatarlarnıñ medeniyetinen tanış etüvge, muqaddes toprağımızda yaşağan bütün milletlerniñ özara munasebetleriniñ eyileşmesine öz issesini qoşar”, – dep qayd etti Meclis reisi.

Mustafa Cemilev Qırımtatar halqı Meclisi adından Çehiya ükümeti ve Amerika Qoşma Ştatlarınıñ halqara inkişaf boyunca agentligine (USAID) Bağçasarayda merkez açqanları içün teren minnetdarlığını bildirdi. Bundan da ğayrı, Mustafa Cemilev şunı da ayttı ki, merkez açılması arfesinde “Azatlıq” radiosı jurnalistiniñ “Ne içün bu işke Çehiya Cumhuriyeti kibi küçük bir devlet yardım ete de, diger avropa memleketleri ise çette qalalar?” degen sualine “Menim fikrimce bizni biz kibi kommunist “lagerini” başından keçirgen devletler yahşı añlaylar”, dep cevap bergen.

Açılış merasiminiñ soñunda Milliy Meclis reisi Mustafa Cemilev ve Çehiya Cumhuriyeti Tışqı işler naziriniñ birinci muavini Yirji Şnayder leyha müellifi Elmira Ablâlimova, merkezniñ hadimleri ile birlikte turistik marşrutlarınıñ biri olğan Hansaray yanında boyanen belgi qoydılar.

Soñra merasimniñ musafirleri ve iştirakçileri Bağçasaray rayonında keçirilgen festival ve medeniy programmalarnıñ taqdimine davet etildiler.

Aqşam qırımtatar folklorı icracılarınıñ iştirakinde azırlanğan acayip kontsertnen yekünlendi.

Şunı da qayd etmeli ki, iyün 11 künü açılış merasiminiñ iştirakçileri Merkezni meydanğa ketirüv leyhasında közde tutulğan turistik marşrut boyunca seferge çıqtılar. Er bir iştirakçige mahsus azırlanğan haritalar berildi.

Malümat içün: 2011 senesi fevral ayında Çehiya Cumhuriyetiniñ Ukrainadaki elçiligi ve “Bağçasaray” regional inkişaf agentligi arasında Bağçasaray regionında turizmni inkişaf ettirüv boyunca leyhanı amelge keçirüv aqqında añlaşma imzalanğan edi. Mezkür leyha Bağçasaray bölgesini 2017 senesine qadar inkişaf ettirüv strategiyasınıñ kerçekleşmesi taba ilk adımdır.