Bağçasarayda «Devlet-Saray» memuriy-medeniy merkezi meydanğa ketirilecek

15 Yanvar 2014

2014 senesi yanvar 13 künü Bağçasarayda Meclis yolbaşçıları tarafından teşkilâtlandırılğan qırımtatar halqı tarihı ve medeniyeti yadikârlıqlarınıñ vaziyeti boyunca toplaşuv ötkerildi.

Onda Ukraina halq deputatı Mustafa Cemilev, Qırım musulmanlarınıñ müftisi haci Emirali Ablayev, Bağçasaray regional meclis azaları, “Qırım” fondı” hayriye teşkilâtınıñ direktolrı Riza Şevqiyev, “Larişes” Qırım tarihiy müzeyiniñ qurucısı Gülliver Altin iştirak ettiler.

Körüşüv devamında “Qırım fondı” tarafından işlenilgen “Devlet-Saray” memuriy-medeniy merkeziniñ leyhası tafsilâtlı muzakere etildi.

Mezkür leyha İsmail Gasprinskiyniñ adınen bağlı tarihiy binada “Larişes” tarihiy müzey, muşavereler salonı, resmiy delegatsiyalarnı qabul etüv salonı, bunıñ kibi de Qırım musulmanları diniy idaresi ve “Qırım fondınıñ” memuriy odalarını közde tuta.

İşbu leyhanıñ amelge keçirilmesi qırımtatar halqı sürgünliginiñ 70 yıllığına bir sıra tedbirlerni yüksek seviyede ötkermek, ukrain ve çetel delegatsiyalarınıñ körüşüvlerini informatsion ve teşkilâtiy ceetten teminlemek, keniş cemaatçılıqnıñ diqqatını qırımtatarlarnıñ tarihiy merkezi olğan Bağçasarayğa celp etmek imkânını berecek.

Memuriy-medeniy merkezni meydanğa ketirmek ğayesini kerçekleştirmek içün “Qırım fondı” bir sıra iş adamlarına muracaat etti. Bugünde-bugün bu leyhağa Meclis reisiniñ muavini Aslan Ömer Kırımlı qoltutmağa razı oldı.

Tamir işleri şu seneniñ yanvar ayında başlanacağı beklenilmekte.

Malümat içün: “Devlet-Saray” medeniy kompleksi Bağçasaraynıñ Salaçıq maallesinde, Qırım hanlığınıñ birinci paytahtınıñ sarayı olğan Qırq yerde yerleşkendir. Saray kompleksinden bugünde-bugün Mengli Geray hannıñ ailesine mensüp on sekiz can, şu cümleden Haci Geray da defn etilgen dürbe körünmekte. Dürbe yanında 15-nci asırğa ait cami binası bar. Bu yerde Qırımda saqlanıp qalğan yekâne oquv müessisesi “Zıncırlı” medresesi de tura. Qırım hanlığınıñ inşaatlarından ğayrı bu yerde qırımtatarlarnıñ ulu mütefekkiri, yazıcı, naşır İ. Gasprinskiy (1851-1914), Amet Özenbaşlı qabirleri ve bunıñ kibi de Zıncırlı medreseniñ yañı (1909) binası da bulunmaqta