Bağçasaray Meclisniñ futbol boyunca kubok saibi oldı

16 September 2012

Sentâbr 16-da Bağçasaray şeerindeki “Drujba” stadionında Meclisniñ futbol boyunca kubogı içün Bağçasaray ve Lenin(Yedi quyu) rayonı taqımları arasında final oyunı olıp keçti.

Yarışnı seyir etmek içün stadionda 200-den ziyade futbol mühlisleri toplandı.

Matç başlanmazdan evel açılış merasiminde Qırımtatar halqı Meclisi reisiniñ muavinleri Remzi İlyasov ve Ahtem Çiygoz, İlmiy Ümerov, Bağçasaray rayon devlet memuriyeti başınıñ muavini Galina Pahar çıqışta bulundılar, “Emine” ansambliniñ artistleri ise yarış iştirakçileri ve seyircilerge qırımtatar halq oyun ve yırlarını bağışladılar.

“Qıymetli futbolcılar”, sizlerni bu bayram yani futbol bayramı ile hayırlamaq ister edim. Aqılıñızdamı, bu yarışlarnıñ başında 17 futbol taqımı olıp, olarnı yedi zonağa bölgen edik, – dedi öz çıqışında Remzi İlyasov. – Olardan tek Bağçasaray ve Lenin rayonı taqımları finalğa çıqtılar.

Bağçasaray taqımınıñ professional ve küçlü olğanını bile edik, lâkin Lenin (Yedi quyu) rayonınıñ taqımı bizler içün sürpriz oldı”.

Sözüniñ soñunda Remzi İlyasov matç yekünlengende em eñ yahşı oyuncılar, em trenerler mukâfatlanacağını söyledi.

Oyunnıñ ilk daqqalarından teşebbüsni elge alğan Bağçasaray taqımınıñ oyuncıları ardı-sıra 2 gol kirsetip, raqiplerini şaşmalattılar ve birinci taymda 5:0 esapnen yeñdiler. Ekinci taymda Lenin rayonı taqımınıñ futbolcıları emin areketke keçtiler, lâkin esapnı teñ etip olamadılar. Neticede Bağçasaray 8:2 esapnen ğalebe qazandı.

Gollarnı Arsen Mustafayev -3, Stanislav Yusupov – 2, Amet Tohtarov, İsmail Ramazanov, Halil Hayredinov ve Ravşan Seydametov 1-yer gol urdılar.

Yarış ğalipleri ve iştirakçilerini mukâfatlamaq içün stadionğa Meclis reisi, Ukraina halq deputatı Mustafa Cemilev keldi. Oyuncı ve trenerlerni samimiy hayırlap, ileride daa da büyük ğalebelerni elde etmekni tiledi. Mağlüp olğan taqımğa ise kederlenmemekni tevsiye etti, çünki ögde daa çoq oyun ve yutuqlar bekley.

Meclis reisi kuboknı Bağçasaray taqımınıñ kapitanına berdi. Bazı oyuncılar hususiy mukâfatlar aldılar.

Edem Seytibragimov (Bağçasaray) ve Memet İsmailov (Yedi-Quyu) eñ yahşı trenerler dep tanıldılar.

Eñ yahşı gölkiper dep Rustem İbragimov (Bağçasaray), eñ yahşı imayeci – Enver Seydamet (Bağçasaray), eñ yahşı yarı imayeci – Vladimir Sinitskiy (Yedi-Quyu), eñ yahşı forvard dep Arsen Mustafayev (Bağçasaray) tanıldılar.

Mukfâatlar taqdim etilgen soñ Ahtem Çiygoz Qırım futbol federatsiyasınıñ reisi Cafer Bekirovğa söz berdi. O ise öz nevbetinde Qırım futbol federatsiyası adından Mustafa Cemilev ve Remzi İlyasovnı “Qırım Muhtar Cumhuriyetinde futbolnı inkişaf ettirüv ve kütleviyleştirüvde elde etken muvafaqiyetleri içün” medal ve yarlıqlarnen taqdirledi.