Azat etilgen siyasiy mabüs Lenur Halilov Qırımğa qayttı

09.09.2025

Rusiyede 18 yılğa mahküm etilgen 57 yaşındaki siyasiy mabüs, “Aluşta” musulman cemiyetiniñ sabıq reisi Lenur Halilov sağlıq vaziyeti sebebinden apis cezasından azat etildi – oña onkologiya hastalığı diagnozı qoyuldı.

Sabıq mabüs Qırımğa kelip, tuvğan köyünde advokatlar, faalciler, soy-sopları ve yaqınlarınen körüşti, anda onıñ qaytması munasebetinen kollektiv dua keçirildi.

2019 senesi ilk yaz ayınıñ 10-nda işğalciler Aluşta imamı Lenur Halilovnı “terrorizmde” qabaatlap apiske aldılar. 2 yıldan soñ, 2021 senesi arman ayınıñ 16-nda, Cenübiy bölgeniñ arbiy mahkemesi onı sert rejimli müstemlekede 18 yılğa üküm etti. 2022 senesi orta küz ayından Lenur Halilov Vladimir merkeziy apishanesinde buluna edi, 2025 senesi kiçik ayda ise Arhangelskke etap etildi. Aman-aman kelgende, adamnı apishaneniñ hastahanesine qoydılar, anda o oraq ayına qadar qaldı. O yerde ekimler hastalıqnı qayd ettiler. Apisten azat etüv qararı Arhangelsk rayon mahkemesinde qabul etildi.