Ayşe Seitmuratova: «Dünyada kimse ebediy degil, ömrüm olsa daa çoq iş yapmaq isteyim…»

11 Fevral 2012

2012 senesi fevral 10 künü İ.Gasprinskiy adına milliy kütüphanede belli uquqqoruyıcı, Qırımtatar halqı milliy areketiniñ veteranı Ayşe Seytmuratovanı 75 yaşını toldurğanı munasebetinen hayırlamağa kelgen dost-eşleri, soy-aqarabaları, safdaşlarınen körüşüvni Qırımtatar halqınıñ maarif ve medeniyet bölügi ve İ. Gasprinskiy adına kütüphane hadimleri teşkil ettiler.

Kitaphanede bu künge bağışlanğan fotosergi açılıp, onda Ayşe hanımnıñ ömüri ve faaliyetini aks ettirgen resim ve resmiy vesiqalar taqdim etildi. Bir ay devamında çalışacaq serginiñ serlevası olaraq Ayşe Seitmuratovanıñ “Vatanımda öz halqımnen beraber yaşağanım men içün eñ büyük yutuq ve bahttır” sözleri alındı.

Kütüphaneniñ oquv salonı Ayşe Seitmuratovanı hayırlamağa kelgenlernen rıq toldı. Ayşe Seitmuratovanı hayırlamağa kelgen belli insanlar arasında Qırımtatar halqı Meclisi reisiniñ birinci muavini Refat Çubarov, Qırımtatar halqı Meclisi prezidiumınıñ azası, Meclisniñ maarif ve medeniyet bölüginiñ başı Safure Kacametova, safdaşları Lir Halilov ve Arsen Alçikov, qırımtatar tasil hadimleri “Maarifçi” birliginiñ azası Seyran Üseinov, yırcı Rustem Memetov, “Nenkecan” mecmuasınıñ baş muarriri Zera Bekirova, “Bizim Qırım” ve “Yaşlar Şurası” gençler teşkilâtları adından Abduraman Egiz ve Elnara Gvardiya ve digerleri bar edi.

“Ayşe abla Seytmuratova er bir işini temelli yapqanı içün de er şey mükemmel ola”, – dedi Qırımtatar halqı Meclisi reisiniñ birinci muavini Refat Çubarov. – O ağır devirlerde onıñ yanında kendisi kibi küçlü, iradeli milletperver insanlar bulunğanı sayesinde küreşimizniñ temeli qaviy olıp qaldı. Tarihte iz qaldırmaq niyetinde olğanlar Ayşe ablam kibi insanlardan ibret alğanlarını ister edim”.

Refat Çubarov bunıñ kibi de şunı qayd etti ki, eñ ağır şaraitte bile halqı oğrunda küreşken insan tarihke kirmek isteginden qatiy nazar ep bir onda iz qaldıra. “Men Ayşe ablamnıñ ömüri ve faaliyeti aqqında aytıp oturmam, bularnı er kes kütüphanede mevcut kitap, gazeta ve mecmualardan oquy bileler. Genç nesilge ise Ayşe Seitmuratovadan ibret almaqnı tevsiye eter edim”, – dedi Çubarov.

“Bizim içün eñ müimi kelecegimiz, balalarımıznıñ kelecegi içün mesülietlik edi, – dedi qırımtatar halqı milliy areketiniñ veteranı Lir Halilov. – İnsan şahıs olaraq sadece almaq degil de, bermekni de ögrengende şekillene. Mencesine, Ayşe Seitmuratova em insan, em şahıs olaraq şekillene bildi”,
Bunıñ kibi de o, dedi ki, sürgünlikte eñ büyük problem olğan intellektual açlıq çekilgende Ayşe Seitmuratovanıñ radioyayınları şahsen oña küç-ilham berdi. Ayşe bugün de başqalarını qayğırmaqnı devam ete, dedi Lir Halilov.

Ayşe Seitmuratovanıñ qırımtatar halqınıñ meselesine dair yazıları “Amerika sedası”, “Continent”, “Muslim World Liga” ve daa bir çoq neşirlerde derc etildi. Kanada, İngiltere, İtaliya, Türkiye, Frantsiya parlamentlerinde, AQŞ kongressinde çıqışları, çeşit ülkelerdeki universitet ve kölleclerdeki lektsiyaları da şu mevzuğa bağışlandı. Körüşüvniñ soñunda qırımtatar halqınıñ şanlı qızı Ayşe Seytmuratova aynı şu aqta ikâye etti ve bunıñ kibi de qırımtatar halqınıñ faciasını cemaatçılıqqa bildirmek içün bulundığı devletlerdeki körüşüvlerni tarif etti.