Ayder Adamanov 80 yaşında

11 October 2012

2012 senesi oktâbr 10 künü İ. Gasprinskiy adına qırımtatar kütüphanesinde milliy areketke bağışlanğan tedbirler sırasında qırımtatar milliy areketiniñ faal iştirakçilerinden biri, keçenlerde 80 yaşını toldurğan Ayder Adamanovnen körüşüv ötkerilip, onıñ “Qırım milletine – milliy muhtariyet” kitabınıñ taqdimi de olıp keçti.

Milliy Meclis adından Ayder Adamanovnı Meclis prezidiumınıñ azası, “Qırım” gazetasınıñ baş muarriri Bekir Mamutov, Tasil problemleri merkeziniñ hadimi Kemal Mambetov, “Krım” DTRK qırımtatar tilinde radioeşittirüvler baş muarriri Server Bekirov, tarihçı Enver Özenbaşlı ve digerleri hayırladılar.

Ayder Adamanov 15 avgust 1932senesi Bağçasaray rayonınıñ Quvuş köyünde dünyağa keldi. 1944 senesi halqınen beraber sürgün etildi.

Eki aliy – pedagogik (Kaz.SSR Güryev ş. 1961 s.) ve politehnik ( Moskva ş. 1965s.). malümat saibidir:

1965 senesinden başlap qırımtatar halqınıñ milliy areketinde faal iştirak ete. 1989 senesi Qırımğa qaytıp keldi. 1993-1997 seneleri Qırımda Milliy areket veteranları keñeşi prezidiumınıñ azası olaraq saylandı.

Kütleviy matbuat vastalarında qırımtatar halqınıñ tolusınen aqlanuvı mevzusında bir sıra maqalelerini bastırdı ve yayınladı.