Avropa Parlamentiniñ deputatı Emine Bozqurt 1944 senesi mayıs 18 sürgünligi aqqında Brüsselde söyledi

18 May 2013

2013 senesi mayıs 18 künü Qırımtatar halqı Qırımdan sürgün etilgeniniñ 69 yıllığı munasebetinen Aqmescitte keçirilgen 40 biñden ziyade insan iştirak etti. Milliy Meclis reisiniñ birinci muavini Refat Çubarov Avropa Parlamentiniñ deputatı Emine Bozqurtnıñ Bütünqırım mitingi iştirakçilerine muracaatını oqudı. Tamırları qırımlı olğan Emine Bozqurt 2013 senesi mayıs 18 künü Avropa parlamentindeki çıqışında qırımtatar halqınıñ eñ büyük faciası aqqında ikâye etti.

“Sürgünlik qurbanlarınıñ hatırası bütün Avropa boylap matem merasimleri keçirilgen bir vaqıtta sizlerni selâmlamaq men içün büyük şereftir. Bir qırımtatar ailesiniñ qızı olaraq men daima siz ile beraber olmaqtam ve Avropa Parlamentinde qırımtatarlar aqqında söyleyim.

Sürgünlikote azap-uqubetler çekken qırımtatarlar küreşlerini ep devam etmekteler. Qırımtatarlar Ukrainağa ve bütün dünyağa “Biz de insanmız, biz de mında yaşaymız” demek, öz medeniyeti ve aqlarını qorçalamaq içün ep küreşmekteler. Bu küreş maña siltem, küç-quvet bermekte. Avropa Birligi qırımtatarlarğa qoltutqanı pek müimdir. Cümleden, Ukrainanıñ Avropa Birligi ile munasebetleri çerçivesinde biz Ukrainada insan aqlarına sayğı kösterilmesine ümüt etemiz. Soñki aylar içinde Avropa parlamenti Ukraina vatandaşları içün viza almaqnı qolaylaştırğan qarar aldı. Bunıñnen biz Ukrainada insan aqları qorçalanması ve demokratiyanıñ inkişafı saasında ilerilevlerni körmege istegenimizni ve devletniñ bu saadaki areketlerine qoltutacağımıznı numayış etemiz. Demek, devlette çeşit milletlerniñ medeniyetine sayğı kösterilmeli. Qırımtatarlarnıñ soyqırımı tanılması kerek ki, yaraları savuşsın. Öyle olmalı ki, qırımtatarlar dünyanıñ neresinde yaşamasınlar, öz medeniyetini inkişaf ettirmek imkânına malik olsunlar, kelecekke ümütnen baqsınlar”