Avropa Parlamenti qırımtatarlarnen bağlı insan aqlarına dair vaziyet boyunca acele mahsus toplaşuv keçirdi

26 Sentâbr 2013

2013 senesi sentâbr 26 künü Brüsselde Avropa Parlamenti qırımtatarlarnen bağlı insan aqlarına dair vaziyet boyunca keçirgen acele mahsus toplaşuvda Avropa Birligi Tışqı Alâqalar Hızmetiniñ “Qırımtatarlarğa nisbeten insan aqları ile bağlı vaziyet boyunca” esabatı diñlendi.

Tışqı Alâqalar Hızmetiniñ vekili Dirk Şübel öz esabatında Avropa Parlamenti tarafından Qırımda amelge keçirilgen leyhalar aqqında ve qırımtatarlarğa nisbeten insan aqları saasında daima alıp barılğan közetüv aqqında malümat berdi.

Munaqaşada Avropa parlamentiniñ azaları Latviyadan İnessa Vaydere ve Gollandiyadan Emine Bozqurt iştirak ettiler.

Fikir paylaşuv devamında taraflar Qırımtatar halqı Meclisiniñ 2014 yılda qırımtatarlarnıñ aqlarını tiklev boyunca halqara forum keçirmek teklifine diqqatnı celp ettiler.

Emine Bozkurt Ukrain devleti içün bu qadar zarur bir forum keçirilmesine Ukraina lâqayd baqqanı sebebinden öz telâşını bildirip, Avropa Birliginiñ qırımtatarlarnıñ aqlarına nisbeten printsipial pozitsiyasınıñ müimligini qayd etti.