Avropa parlamenti bütün Qırım siyasiy mabüslerini acelen azat etmege çağırdı

19 December 2024

İlk qış ayınıñ 19-nda Avropa parlamentiniñ mebusları Rusiye tarafından Qırım Muhtar Cumhuriyeti ve Aqyar şeeriniñ işğaliniñ 11-inci yılına ve işğal etilgen Qırımda insan aqları vaziyetiniñ fenalaşmasına dair rezolütsiyanı qabul ettiler.

Rezolütsiyada qayd etildi ki, Rusiyeniñ işğalli quvetleri Qırımda vatandaşlarnı, hususan, qırımtatar cemiyetiniñ siyasiy faal azalarını, jurnalistlerni, dissidentlerni yaqalay, em de qırımtatarlarnı uydurılğan terrorizm qabaatlavları boyunca taqip ete.

“Rusiyeniñ apishanelerinde 200-den çoq Qırım siyasiy mabüsi tutula, olarnıñ arasında 133-ü qırımtatar ve 67-si siyasiy mabüs ağır sağlıq meseleleri bar ve olarğa baqılmaq kerek”, – dep aytıla vesiqada.

Rezolütsiyada qanunsız sürette apiske alınğan Qırım faalcileriniñ adları da qayd etildi, şu cümleden:

• İrına Danılovıç – 2022 senesi Rusiye mahsus hızmetleri tarafından hırsızlanğan ve altı yıldan çoq apis cezasına maküm etilgen jurnalist ve uquq qorçalayıcı;
• Tofik Abdulgaziyev – 2019 senesi tevqif etilgen ve temelsiz qabaatlavlar boyunca 12 yıl apis cezasına maküm etilgen cemaat faalcisi;
• Amet Süleymanov – qırımtatarlarğa qarşı repressiyalarnı aydınlatqan cemaat jurnalisti, 12 yılğa azatlıqtan marum etildi.

Avropa Parlamenti bütün Qırım siyasiy mabüslerini acelen azat etmege, olarğa tibbiy yardım köstermege ve qorantaları, advokatlar ve halqara teşkilâtlar, şu cümleden Halqara Qızıl Haç Eyyeti ve Birleşken Milletlerniñ zorbalıq ya da mecburiy olmağan ğayıp oluvlar boyunca iş gruppasınen körüşmege izin bermege çağırdı.

“Qırımnıñ kelecegi qırımtatarlarnıñ yarımadağa öz tarihiy vatanı olaraq ayırılmaz aqqınıñ tanılması ve qorçalavınen bağlı olmalı”, – dep metinde qayd etildi.

Rezolütsiya, 2014 senesinden başlap, Rusiyeniñ Ukrainağa istilâsını qaplap alacaq Ukrainağa qarşı tecavuz cinayeti boyunca mahsus makemeni meydanğa ketirmek kerekligini de hatırlata. Vesiqağa 446 mebus qol tuttı, 25 adam qarşı çıqtı, 51 ise bitaraf qaldı.