Aslan Ümerov Kiyevde Qırımtatarlar cemiyetiniñ reisi olaraq saylandı

24 February 2013

23 fevral künü Kiyevde Qırımtatar cemiyetiniñ umumiy toplaşuvı olıp keçti. Toplaşuvdan evel belli cemaat erbabı, Qırım cumhuriyetiniñ reisi, Qırım, Poloniya ve Litva musulmanlarınıñ müftisi Noman Çelebicihannıñ hatırası añıldı, dep haber ete cemiyetniñ matbuat hızmeti.

Toplaşuvda Qırımtatar halqı Meclisiniñ azaları Zair Smedlâyev, Ali Hamzin ve Zaur Smirnov iştirak ettiler. Qurultay delegatlarını saylav boyunca Merkeziy saylav komissiyasınıñ reisi Zair Smedlâyev öz çıqışında regional meclislerge ve Kiyevde Qurultay delegatlarını saylavlarnıñ ketişatı aqqında ayttı.

Meclisniñ tışqı alâqalar bölüginiñ başı Ali Hamzin Kiyevdeki qırımtatarlarnıñ faalligi pek müim olğanını qayd etip, cemiyet azalarına mahsuldar çalışmaqnı tiledi.

Cemiyet idaresi birleşmeniñ qurumı ve kelecekteki inkişaf planlarınen tanış etti. Saylav neticelerine köre Kiyev şeerindeki qırımtatar cemiyetiniñ reisi olaraq Aslan Ümerov saylandı.

İdarege Bekir Ğaniyev, Femi Mustafayev, Refat Sarıyev, Talât Bilâlov kirdiler.

Cemiyet Teftiş komissiyası Abduraman Egiz, Rustem Aliyev ve Elvina Şeyhislâmovadan tertip etildi.