Arseniy Yatsenük: Meclis reisinen beraber beyanat imzaladığımız milliy azlıqlarnı qorçalav boyunca pozitsiyamıznıñ ifadesidir

28 Iyül 2012

“Qırımtatar halqınıñ Meclisinen emekdaşlığımız biz içün pek müimdir”, – dedi Birleşken muhalifet Bütünukrain “Batkivşçina” birleşmesi Merkeziy saylav ştabınıñ başı Aleksandr Turçinov. – Biz Mustafa Cemilevni çoq yıllardan berli tanıymız. Bu insan imperiya rejiminiñ apshanelerinde de küreşip, ğalip olmağa alışqındır. Bizlerni çoq şeyler birleştire”.

Bu aqta Turçinov 2012 senesi iyül 27 künü olıp keçken matbuat konferentsiyasında ayttı. Onda “Batkivşçina” Bütünukrain birleşmesi ve Qırımtatarlar halqı meclisiniñ 2012 senesi parlament saylavlarında iştirak etüv boyunca müşterek beyanatı imzalandı.

Öz nevbetinde Qırımtatarlar halqı meclisiniñ başı Mustafa Cemilev bildirdi ki, yaqın vaqıtta Meclisniñ toplaşuvı keçirilip, qırımtatar halqı vekâletli organınıñ azaları kesen-kes qarar qabul etecekler. “Biz ğalebe qazanacağımızğa ümüt etemiz, er alda oña irişmek içün elimizden kelgenni yaparmız”, – dedi Mustafa Cemilev.

İmzalanğan beyanatnı izaatlağan Birleşken muhalifet Bütünukrain “Batkivşçina” birleşmesi keñeşiniñ reisi Arseniy Yatsenük emin ki, taraflar pek mesülietli ve ciddiy qarar aldılar.

“Bu mesülietli ve ciddiy qarardır, çünki soñki vaqıtta koalitsion çoqluq, meselâ Simonenko, sürgünlikni aqlamağa tırışalar. İosif Stalin qırımtatar halqını sürgün etmeknen ölümden qurtardı demek, menimce, tarihiy faktlarnı aqaret etüv demektir, – dedi Yatsenük. – Ve bugün çoqları böyle fikirdeler”.

Arseniy Yatsenükniñ aytqanına köre, birleşken muhalifet öz programmasında tamır halqlar ve milliy azlıqlarnıñ meselelerine bayağı diqqat ayırdı. Meclisnen birlikte beyanat imzalanğan soñ Birleşken muhalifetniñ programmasında tamır halqlar ve milliy azlıqlarnı qorçalav boyunca ayrıca madde ve ayrıca bölük olacaq.

“Qırımtatar halqı Meclisiniñ reisinen beraber beyanat imzaladığımız milliy azlıqlarnı qorçalav boyunca pozitsiyamıznıñ ifadesidir, beyanat eki tilde – ukrain ve qırımtatar tilinde imzalanğanını ayrıca qayd etmelidir”, – dedi Yatsenük.

Hatırlatamız ki, iyül 27 künü Birleşken muhalifet Bütünukrain “Batkivşçina” birleşmesi keñeşiniñ reisi Arseniy Yatsenük, Qırımtatar halqı Meclisiniñ reisi Mustafa Cemilev ve Birleşken muhalifet Bütünukrain “Batkivşçina” birleşmesi Merkeziy saylav ştabınıñ başı Aleksandr Turçinov Birleşken muhalifet ve Meclis 2012 senesi parlament saylavlarında beraber iştirak etecekleri aqqında müşterek beyanatnı imzaladılar.

” Birleşken muhalifet Bütünukrain “Batkivşçina” birleşmesi ve Qırımtatar halqınıñ Meclisi 2012 senesi parlament seçimlerinde qanunğa riayet etilmesi, , saylav ceryanı iştirakçileri içün episi basqıçlarda musaviy imkânlar berilmesi, saylavlarnıñ namuslı, adaletli ve açıq nketiceleri elde etilmesini teminlev meselelerinde işbirlikte bulunacaqlar.

Birleşken muhalifet Bütünukrain “Batkivşçina” birleşmesi ve Qırımtatar halqınıñ Meclisiniñ müşterek beyanatı ukrain ve qırımtatar tillerinde imzalandı.

Haberlerge video