“Armançıq” mecmuasınıñ muarriri Ediye Muslimova ğayıp oldı

22 Noyabr 2024

Qırımda “Armançıq” qırımtatar bala mecmuasınıñ baş muarriri 61 yaşındaki Ediye Muslimova ğayıp oldı. Boş aynıñ 21-nden itibaren o, bağğa çıqmay, şahsiy ve iş telefonları söndürilgen. Qorantası poliske muracaat etti ve yerli prokurorlıqqa şikâyet arizasını azırlay.

Qırım birdemligine onıñ qardaşınıñ qızı Elzara Muslimova bunı bildirdi.

— Biz onıñnen laf ettik, ve o, ev işleri bitirecek ve Aqmescitteki Kıyivska soqağından Sudaq şeerine doğru, Qoz köyüne, öz anasına ketecegini ayttı, — dedi qardaşınıñ qızı.

Onıñ aytqanına köre, Ediye Muslimovanıñ anası 91 yaşında. O, qızı ve başqalardan yardımğa muhtac. Yaş qadınnıñ birinci dereceli saqatlığı bar. Saat 18:00de o, Elzarğa telefon etti ve Ediye alâ daa yoq, dep ayttı.

— Qartanam oña endi saat 16:00dan berli telefon açamağan edi. Saat 15:00te bile oña qardaşınıñ qızı telefon etti, amma onıñ endi bağı yoq edi. Men telefon etmege başladım. Onıñ eki telefonı bar (iş telefonı ve adiy şahsiy), eki telefonı söndürilgen. İç bir bağ yoq: ne Telegram, ne WhatsApp, ne Viber vastasınen bağlap oldım, — dep qoştı qardaşınıñ qızı.