«Armançıq» balalar mecmuası öz qorantası aqqında ana tilinde yazılğan eñ yahşı ikâye içün yarışınıñ ğaliplerini Mecliste taqdirlediler

27 Dekabr 2013

Qırımtatar tilinde çıqqan yekâne “Armançıq” balalar mecmuası öz qorantası aqqında ana tilinde yazılğan eñ yahşı ikâye yarışınıñ neticelerine yekün çekti. Mecmua baş muarriri Ediye Müslimovanıñ söylegenine köre yarışta iştirak etmege istegenlerniñ pek çoq oluvı bala neşiriniñ muarririyetini ğayet quvandırdı.

“Yarışta faqat qırımtatar balaları degil de, başqa millet vekilleri de iştirak ettiler, – dedi E. Müslimova. – İşte, eñ yahşı ikâye yazğan müelliflerden biri Sudaq milliy mektepniñ 3-nci sınıf talebesi Darina Kril”.

Bütün ikâyeler mecmuanıñ kelecek sanlarında basılacaq. “Bu bizim birinci yarışımız edi, amma ğayelerimiz pek çoq ve biz bu ananeni devam etmek meramındamız, – dey E. Müslimova. – Kollektivimiz balalar tarafından mecmuamızğa diqqat ve meraq köstergenlerine pek sevine, balalar bizge acayip resimler, qırımtatar tilinde şiir ve ikâyeler yollamaqtalar”.

Dekabr 27 künü Meclis ofisinde “Armançıq”.mecmuası ilân etken yarışnıñ ğaliplerini mukâfatlav merasimi ötkerildi.

Meclis reisi Refat Çubarov ve mecmuanıñ baş muarriri Ediye Müslimova eñ yahşı, dep tanılğan beş ikâyeniñ müelliflerine planşet ve Meclisniñ şeref yarlıqları berdiler, yarışnıñ daa on iştirakçisi ise “Armançıq” mecmuasınıñ logotipi olğan bardaqlarnen taqdirlediler.

Talebelerge öz bilgilerini aşlağan istidatlı ocalar da diqqatsız qalmadılar. Refat Çubarov Eski Qırım milliy mektebiniñ ocaları Lenura Abdullayeva ve Mümine Ablâlimovağa, bunıñ kibi de Sudaq milliy mektebiniñ ocası Lenura Suleymanovağa Meclisniñ Fahriy yarlıqları ve “Mustafa Cemilevniñ altıncı mahkemesi” kitabını taqdim etti.

“Qırımtatar halqınıñ Meclisi siz kibi nufuzlı ve fahriy musafirlerni qabul etkeninen pek ğururlana, – dedi Meclis reisi Refat Çubarov, yarış iştirakçilerine muracaat eterek. – Siz milletimiznin kelecegisiñiz ve öz ğalebeleriñiznen bunı tasdiqlaysıñız.

Er biriñiz ana tilini ve halqnı sevesiz, aileviy ananelerni qorçalay ve kütesiñiz”. Meclis reisi yarış teşkilâtçıları ve balalarnıñ istidatını inkişaf ettirüvge, ana tiline sevgi aşlavğa yardım etkenleri içün ana-babalar ve ocalarğa teşekkür bildirdi.

Yaş müelliflerni zaferlerinen hayırlağan mecmua baş muarriri Ediye Müslimova yarış iştirakçileri arasından kelecekte jurnalistler, milliy gazeta ve mecmualarnıñ muarrirleri yetişecegine eminlik bildirdi.

“Men eminim ki, kelecekte bizim balalarımız, angi milletke mensüp olğanlarından qatiy nazar, öz istidatlarını kösterirler. Biz ise olar aqqında “Armançıq”ta ikâye etermiz”, – dep qayd etti Ediye Müslimova.

Bunıñ kibi de balalarnı yeñişlerinen Meclisniñ Qırımtatar tilinde tasil meseleleri ve qırımtatar tilini Qırımnıñ devlet ve cemaat ömürinde tadbiq etüv boyunca idaresiniñ başı Emine Avamileva ve “Fidançıq” balalar inkişafı merkeziniñ tesisçisi de hayırladı.

Tedbirden soñ balalar içün tatlı sofra donatıldı.

Aşağıda yarış ğaliplerinini cedvelini taqdim etemiz:

Emirali Nuraliyev, Eski Qırım milliy mektepniñ 4-nci sınıf talebesi;

Elmaz Abseutova, Qurman rayonı Petrovka köy mektebiniñ 5-nci sınıf talebesi;

Totay Amzayeva, Sudaq milliy mektepniñ 3-A sınıf talebesi;

İslâm Rustemov, Eski Qırım milliy mektepniñ 3-nci sınıf talebesi;

Emine Asanova, Sudaq milliy mektebi;

Bekir Ablayev, Kefe

Diana Belâlova, Sudaq;

Emine Üseinova, Sudak;

Zera Temirgaziyeva, Aqmescit;

Feride Suleymanova, Sudaq;

Fatima Seithalilova, Taraqtaş, Sudaq rayonı;

Sabina Saydametova, İçki;

Darina Kril, Sudaq;

Elvina Kerimova, Sudaq;

Ahtem Arap, İçki.