Aqyarda Ukraina vatandaşınıñ toprağını alıp çıqaralar
![Aqyarda Ukraina vatandaşınıñ toprağını alıp çıqaralar](https://qtmm.org/wp-content/uploads/2024/05/zemuchastok-e1627040241864.jpg)
Rusiye makemesi, prokurorlıqnıñ teklfini qanaatlendirmege qarar aldı. Böylece, Ukraina vatandaşı Aqyardaki 400 metr kvadrat toprağından marum etilecek. Qırım.Aqiqat bu aqqında haber berdi.
Bildirildi ki, onıñ toprağı Balıqlava rayonınıñ “Teremok” STde yerleşe.
“Topraq qanunlarına köre, ecnebiy vatandaşlar, sıñırğa yaqın bölgelerde, şu cümleden Aqyar şeerinde, topraqqa saip olamazlar”, – bildirdiler.
2020 senesi rusiye akimiyeti bir qanun aldı. Oña binaen, sıñırğa yaqın bölgelerde ecnebiy vatandaşlar topraqqa saip olamazlar. “Sıñırğa yaqın” bölgeler cedveline deyerli bütün işğal etilgen yarımada kirsetildi. Rus pasportını almağan ve Qırımdaki topraqqa saip olğan Ukraina vatandaları ise ecnebiyler olaraq tanındılar.
Ukrain uquq qorçalayıcıları ve akimiyeti, Qırımda mülkni alıp çıqaruvnı cenk cinayeti olaraq tanıylar.