Aqyarda Noman Çelebicihan hatırasına miting ötkerildi

23 February 2013

Qırımtatar halqınıñ körümli siyasiy ve cemaat erbabı Noman Çelebicihan öldürilgeniniñ 95 yıllığı munasebetinen Aqyarda Vosstavşih meydanında Milliy Meclis Aqyar ve Bağçasaray regional meclislernen birlikteki teşebbüsinen matem mitingi keçirildi. Ulu insannıñ hatırasını añmaq içün fevral 23 künü mında 1000-den ziyade insan toplandı

Tamam 95 yıl evelsi – 1918 senesi 23 fevral künü Aqyarda şeer apshanesiniñ divarı tübünde sarhoş bolşevikler zulumından Noman Çelebicihan vahşiyane öldürildi.

Miting “Ant etkenmen” milliy gimni ve Ukraina devlet gimni ile başlanıp, urf-adetlerimizge köre şanlı insanımıznıñ ruhuna dua oquldı. Duanı Qırım musulmanlarınıñ müftisi Emirali efendi oqudı, Aqyar mektepleriniñ talebeleri ise milliy qaraman şerefine şiirler icra ettiler.

Mitingde Meclis reisiniñ birinci muavini Refat Çubarov, Qırım musulmanlarınıñ müftisi Emirali Ablayev, Aqyar ve Bağçasaray regional meclislerniñ azaları, milliy areket iştirakçileri, Aqyarda Ukraina subayları birligi reisiniñ muavini, 2 rang kapitanı Timur Barotov ve cemaat teşkilâtlarınıñ azaları iştirak ettiler.

“Bugün Qırımtatar halqınıñ körümli siyasiy ve cemaat erbabı Noman Çelebicihan öldürilgenine 95 yıl oldı, – dep açtı mitingni Aqyar regional meclis reisi Enver Mamutdinov. – Aynı şu yerde, evelki apshane divarları tübünde 33 yaşlı Noman Çelebicihan soñki nefesini aldı”.

Qırım musulmanlarınıñ müftisi Emirali Ablayevniñ bildirgenine köre fevral 22 künü Qırımnıñ bütün camilerinde Noman Çelebicihan ruhuna namaz qılındı. “Vatan ve millet sevgisini işi ve areketlerinen isbat etken insannıñ hatırası ögünde temenna etmek boyun borcumızdır”, – dedi Qırım müftisi.

Mitingiñ soñunda divardaki hatıra tahtasına çeçekler qoyuldı.