AQŞ Qırımdaki vaqialar munasebetinen qoyğan sanktsiyaları em Ukraina, em Rusiyedeki şahıslarğa toqunacaq

15 Mart 2014

2014 senesi mart 14 künü Brüsselde iş ziyareti ve NATO Baş kâtibiniñ muavini Aleksandr Verşbou, Avropa Birliginiñ tışqı siyaset boyunca Aliy temsilcisiniñ yardımcısı Pyer Vimont ve NATOğa kirgen devlet elçileri ile olıp keçken körüşüvlerniñ neticeleri aqqında esabat bergen qırımtatar halqınıñ lideri, Ukraina halq deputatı Mustafa Cemilev NATO ve Avropa halqara institutları Rusiyege cenk açmaq variantını közde tutmasalar da sanktsiyalar pek qattı olacağını söylegenlerini bildirdi.

Mart 15 künü Ukraina halq deputatı Mustafa Cemilev Kiyevde Ukrainağa resmiy ziyaretnen kelgen Amerika senatorlarınen körüşti.

Amerikalı meslekdeşleri ile körüşüv vaqtında Mustafa Cemilev Qırımdaki soñki vaqialarnen bağlı meseleler ve bunıñ kibi de Qırım ve Qırımnıñ etrafındaki siyasiy inqiraznı çezüv yollarını muzakere etti.

Öz nevbetinde cumhuriyetçi senator Con Makkeyn qayd etti ki, AQŞ Qırımdaki vaqialar munasebetinen qoyğan sanktsiyaları em Ukraina, em Rusiyedeki şahıslarğa toqunacaq.

Onıñ sözlerine köre Ukrainada sanktsiyalarğa hususiy şahıslar degil de, yuridik şahıslar, yani biznes kompaniyaları da oğratılacaq. AQŞ senatorlarınıñ qayd etkenine köre Qırım inqirazını faqat siyasiy yolnen çezmek mümkün.